കമല്‍ ഹാസന്റെ വരാനിരിക്കുന്ന ചിത്രം വിക്രമിനെ കുറിച്ചുള്ള ചര്‍ച്ചകളിലാണ് കോളിവുഡ് സിനിമ ലോകം. നിലവില്‍ പ്രീ പ്രൊഡക്ഷന്‍ ഘട്ടത്തിലുള്ള ചിത്രത്തിന്റെ നിര്‍മ്മാതാക്കള്‍ അഭിനേതാക്കളെയും അണിയറപ്രവര്‍ത്തകരെയും തീരുമാനിക്കുന്ന തിരക്കിലാണ്.ഫഹദ് ഫാസില്‍ ടീമിന്റെ ഭാഗമാണെന്ന് നേരത്തെ തന്നെ സ്ഥിരീകരിച്ചിരിക്കുന്നു. വിജയ് സേതുപതിയും ആന്റണി വര്‍ഗീസും ചിത്രത്തില്‍ ഉണ്ടെന്നും പറയപ്പെടുന്നു. ഇപ്പോളിതാ വിക്രമിനെ കുറിച്ചുള്ള പുതിയ വിവരങ്ങള്‍ പുറത്തുവന്നിരിക്കുകയാണ്.
ലോകേഷ് കനകരാജ് സംവിധാനം ചെയ്യുന്ന ചിത്രത്തില്‍ മാസ്റ്ററിലെ അതേ സാങ്കേതിക ടീമിനെ നിലനിര്‍ത്തുമെന്നാണ് വിവരം.അനിരുദ്ധ് സംഗീതവും സത്യന്‍ സൂര്യന്‍ ക്യാമറയും കൈകാര്യം ചെയ്യും എന്ന് നേരത്തെ തീരുമാനിച്ചിരുന്നു. എന്നാല്‍ ഛായാഗ്രഹണം കൈകാര്യം ചെയ്യാന്‍ പുതിയ ആള്‍ എത്തുന്നു എന്നാണ് റിപ്പോര്‍ട്ടുകള്‍.സത്യന്‍ മറ്റ് ചില പ്രോജക്ടുകളുടെ തിരക്കിലായതിനാല്‍ ഗിരീഷ് ഗംഗാധരന്‍ ടീമിനൊപ്പം ചേരും എന്നാണ് വിവരം.'ജല്ലിക്കട്ട്' എന്ന സിനിമയ്ക്ക് ഛിയാഗ്രഹണം നിര്‍വഹിച്ചത് ഗിരീഷാണ്. വിജയുടെ 'സര്‍ക്കാര്‍' എന്ന ചിത്രത്തിലൂടെയാണ് അദ്ദേഹം തമിഴില്‍ അരങ്ങേറ്റം കുറിച്ചത്. ഇതു സംബന്ധിച്ച ഔദ്യോഗിക പ്രഖ്യാപനം അടുത്തുതന്നെ ഉണ്ടാകും എന്ന് പ്രതീക്ഷിക്കുന്നു.