റേഞ്ച് റോവര്‍ ഇവോഖ് ലാന്‍ഡ്മാര്‍ക്ക് എഡിഷന് ഇന്ത്യയില്‍ അവതരിപ്പിച്ചു. ഇവോഖിന്റെ ആറാം വാര്‍ഷികാഘോഷത്തോടനുബന്ധിച്ചാണ് ഈ സ്പെഷ്യല് എഡിഷനെ ലാന്‍ഡ് റോവര്‍ ഇന്ത്യയില്‍ അവതരിപ്പിച്ചിരിക്കുന്നത്. സാധാരണ മോഡലിന്റെ എസ്ഇ അടിസ്ഥാനപ്പെടുത്തിയാണ് പുതിയ റേഞ്ച് റോവര്‍ ഇവോഖ് ലാന്‍ഡ്മാര്‍ക്ക് എഡിഷന് എത്തുന്നത്.
ആകര്‍ഷകമായ ബോഡി കളേര്‍ഡ് ലോവര്‍ ബോഡി ക്ലാഡിംഗ്, ബോഡി സ്‌റ്റൈല്‍ കിറ്റ്, ഗ്രാഫൈറ്റ് അറ്റ്‌ലസ് ഗ്രില്‍, ടെയില്‍ഗേറ്റ് ബാഡ്ജിംഗ്, ഫെന്‍ഡര്‍ വെന്റ് എന്നിങ്ങനെയുള്ള സവിശേഷതകള്‍ പുതിയ ഇവോഖില്‍ ഉള്‍പ്പെടുത്തിയിട്ടുണ്ട്. അതോടൊപ്പം തന്നെ പുറമെ ഗ്ലോസ് ബ്ലാക് ഫിനിഷിലുള്ള 18 ഇഞ്ച് അലോയ് വീലുകളും മൂന്ന് എക്സ്റ്റീരിയര്‍ നിറങ്ങളും കര്‍പാത്തിയന്‍ ഗ്രെയ് കോണ്‍ട്രാസ്റ്റ് റൂഫും ഈ സ്പെഷ്യല് എഡിഷനിലുണ്ട്.
2.0 ലിറ്റര്‍, ഫോര്‍സിലിണ്ടര്‍ ഡീസല്‍ എഞ്ചിനാണ് റേഞ്ച് റോവര്‍ ലാന്‍ഡ്മാര്‍ക്ക് എഡിഷന് കരുത്തേകുന്നത്. 117 ബി എച്ച് പി കരുത്തും 430 എന്‍ എം ടോര്‍ക്കും ഉത്പാദിപ്പിക്കുന്ന ഈ എഞ്ചിനില്‍ 10 സ്പീഡ് ഓട്ടോമാറ്റിക് ഗിയര്‍ബോക്‌സാണ് ഒരുക്കിയിരിക്കുന്നത്. 100 കിലോമീറ്റര്‍ വേഗത കൈവരിക്കാന്‍ വെറും ഒമ്പത് സെക്കന്‍ഡുകള്‍ മാത്രമേ ഈ സ്പെഷ്യല് എഡിഷന് ആവശ്യമുള്ളൂ.