ഇന്ത്യയെ ഇന്ത്യന്‍ മണ്ണില്‍ തോല്‍പ്പിക്കാനാകുമെന്ന് ന്യൂസിലന്‍ഡ് മറ്റ് ടീമുകള്‍ക്ക് കാണിച്ചുകൊടുത്തുവെന്ന് ന്യൂസിലന്‍ഡ് പേസറായ ടിം സൗത്തി. ഇന്ത്യക്കെതിരായ 3 മത്സരങ്ങളടങ്ങിയ ടെസ്റ്റ് പരമ്പര സ്വന്തമാക്കിയതിന് പിന്നാലെയാണ് ടിം സൗത്തിയുടെ പ്രതികരണം. 12 വര്‍ഷത്തിനിടെ ഇതാദ്യമായാണ് ഹോം ഗ്രൗണ്ടില്‍ ഇന്ത്യ ഒരു ടെസ്റ്റ് പരമ്പര കൈവിടുന്നത്.
ന്യൂസിലന്‍ഡിനായി 100 ടെസ്റ്റ് മത്സരങ്ങള്‍ കളിച്ച ടിം സൗത്തി ടീമിലെ ഏറ്റവും സീനിയര്‍ കളിക്കാരനാണ്. ഇന്ത്യന്‍ പര്യടനത്തിന് മുന്‍പ് ശ്രീലങ്കയില്‍ ന്യൂസിലന്‍ഡ് കളിച്ചെങ്കിലും ടെസ്റ്റ് പരമ്പരയില്‍ കിവികള്‍ പരാജയപ്പെട്ടിരുന്നു. ഇന്ത്യയെ പരാജയപ്പെടുത്തുക എന്നത് പ്രയാസമായ കാര്യമാണ്. അതിനാല്‍ കഴിഞ്ഞ ആഴ്ചകള്‍ ഏറെ സ്‌പെഷ്യലാണ്. ഇതിന് മുന്‍പും ന്യൂസിലന്‍ഡിന്റെ മികച്ച ടീമുകള്‍ ശ്രമിച്ചിട്ടും ചെയ്യാനാവാത്ത കാര്യമാണ് ഞങ്ങള്‍ ചെയ്തത്. കഴിഞ്ഞ 12 വര്‍ഷമായി 18 സീരീസുകളില്‍ ഇന്ത്യ അപരാജിതരായിരുന്നു. ഞങ്ങള്‍ക്ക് അത് തിരുത്താനായി. ഇത് മറ്റ് ടീമുകള്‍ക്കും ഇന്ത്യയെ തോല്‍പ്പിക്കാനാകുമെന്ന ആത്മവിശ്വാസം നല്‍കും. ടിം സൗത്തി പറഞ്ഞു.