വിരാട് കോലിയെ നായക സ്ഥാനത്തുനിന്ന് മാറ്റാന്‍ ആലോചിക്കുന്നില്ലെന്ന് ബിസിസിഐ. പരിമിത ഓവര്‍ ഫോര്‍മാറ്റുകളില്‍ നിന്ന് കോലി ക്യാപ്റ്റന്‍ സ്ഥാനം ഒഴിയുമെന്ന് നേരത്തെ ചില ദേശീയ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഈ വാര്‍ത്തകള്‍ അടിസ്ഥാന രഹിതമാണെന്ന് ബിസിസിഐ ട്രഷറര്‍ അരുണ്‍ ധുമാല്‍ പറഞ്ഞു. ടി 20 ലോകകപ്പിന് ശേഷം ഏകദിന, ടി 20 ഫോര്‍മാറ്റുകളില്‍ നിന്ന് കോലി നായകസ്ഥാനം ഒഴിയുമെന്നും രോഹിത് ശര്‍മ നായകനാകുമെന്നും ആയിരുന്നു റിപ്പോര്‍ട്ട്. ടെസ്റ്റില്‍ കോലി നായകസ്ഥാനത്ത് തുടരുമെന്നും ഈ റിപ്പോര്‍ട്ടില്‍ ഉണ്ടായിരുന്നു. എന്നാല്‍, ബിസിസിഐ ഇങ്ങനെയൊരു നീക്കത്തെ കുറിച്ച് ആലോചിക്കുന്നില്ലെന്ന് ധുമാല്‍ വ്യക്തമാക്കി. വിവിധ ഫോര്‍മാറ്റുകളില്‍ നായകസ്ഥാനം മാറ്റി പരീക്ഷിക്കുന്ന രീതിയോട് ബിസിസിഐക്ക് യോജിപ്പില്ലെന്നാണ് പുറത്തുവരുന്ന പ്രതികരണങ്ങള്‍.
