സ്കോഡ അടുത്തിടെ ഇന്ത്യൻ വിപണിയിൽ പുറത്തിക്കിയ മിഡ്-സൈഡ് എസ്യുവി കരോഖിന്റെ ഇന്ത്യയിൽ തന്നെ നിർമ്മിയ്ക്കാൻ ഒരുങ്ങി സ്കോഡ. ഒറ്റ വേരിയന്റിൽ മാത്രം പുറത്തിറങ്ങിയിട്ടുള്ള കരോഖിന്റെ ആയിരം യൂണിറ്റുകളാണ് സ്കോഡ ഇന്ത്യയിൽ എത്തിച്ചിരിയ്ക്കുന്നത്. ഇതിന്റെ വിൽപ്പനയുടെ അടിസ്ഥാനത്തിലായിരിയ്ക്കും പ്രാദേശികമായി വാഹനം നിർമ്മിയ്ക്കുന്നതിൽ അന്തിമ തീരുമാനമെടുക്കുക എന്നാണ് റിപ്പോർട്ടുകൾ.
24.99 ലക്ഷം രൂപയാണ് വാഹനത്തിന് ഇന്ത്യൻ വിപണിയിലെ വില. ഫോക്‌സ്‌വാഗണ്‍ ടി-റോക്കിന്റെ അടിസ്ഥാനമായ എംക്യുബി പ്ലാറ്റ്‌ഫോമിലാണ് കരോഖും ഒരുക്കിയിരിക്കുന്നത്. കാഴ്ചയിൽ സ്കോഡ കോഡിയാക്കിന് സമാനമാണ് കരോഖും. സ്കോഡ സിഗ്‌നേച്ചര്‍ ബട്ടര്‍ഫ്‌ളൈ ഗ്രില്ല്, ഡിആര്‍എല്ലുകള്‍ നല്‍കിയിട്ടുള്ള വലിയ എല്‍ഇഡി ഹെഡ്‌ലാമ്പ്, വലിയ എയര്‍ഡാം, എന്നിവയാണ് മുന്നിൽനിന്നുമുള്ള പ്രധാന കാഴ്ച
പ്രീമിയമാണ് കരോഖിലെ ഇന്റിരിയർ. ഫോക്‌സ് സ്മാര്‍ട്ട് ലിങ്ക് കണക്ടിവിറ്റിയുള്ള 8 ഇഞ്ച് ഇന്‍ഫോടെയ്‌ൻമെന്റ് സിസ്റ്റം, ഡ്യുവല്‍ ടോണ്‍ ക്ലൈമറ്റ് കണ്‍ട്രോള്‍, മള്‍ട്ടി ഫങ്ഷന്‍ സ്റ്റിയറിങ്ങ് വീല്, ഫുള്ളി ഡിജിറ്റല്‍ ഇന്‍സ്ട്രുമെന്റ് കണ്‍സോള്‍ എന്നിവയാണ് ഇന്റീരിയറിലെ പ്രത്യേകതകൾ. 148 ബിഎച്ച്‌പി പവറും 250 എന്‍എം ടോര്‍ക്കു സൃഷ്ടിയ്ക്കുന്ന 1.5 ലിറ്റര്‍ ടിഎസ്‌ഐ ടര്‍ബോചാര്‍ജ്ഡ് പെട്രോള്‍ എന്‍ജിനാണ് വാഹനത്തിന് കരുത്ത് പകരുന്നത്. ഏഴ് സ്പീഡ് ഡിഎസ്ജി ഓട്ടോമാറ്റിക് ഗിയര്‍ബോക്‌സാണ് വാഹനത്തിലെ ട്രാൻസ്‌മിഷൻ.