വീടുകളിലും ദേവാലയങ്ങളിലുമായി മോഷണം നടത്തിവന്ന വന്‍ കവര്‍ച്ചാ സംഘം പൊലീസ് പിടിയില്‍. സംസ്ഥാനത്ത് വിവിധ സ്ഥലങ്ങളില്‍ നടന്ന വന്‍ കവര്‍ച്ചാ കേസുകളിലെ പ്രതിയായ കോഴിക്കോട് സ്വദേശി ഷിജു ഉള്‍പ്പെടെയുള്ള സംഘമാണ് വിദ്യാനഗര്‍ പൊലീസിന്റെ വലയിലായത്.
പാലക്കാട് ആലിക്കര സ്വദേശി മുഹമ്മദ് ഷെറിന്‍, നക്രാജെ ചൂരിപ്പള്ളത്തെ കാസിം ഷഫീഖ് എന്നിവരാണ് അറസ്റ്റിലായ മറ്റു രണ്ട്പേര്‍. പൊയ്‌നാച്ചി സെന്റ് മേരീസ് ചര്‍ച്ചിലും നായന്‍മാര്‍ മൂലയിലെയും ബണ്ടിച്ചാലിലെയും വീടുകളില്‍ കവര്‍ച്ച നടത്തിയത് പിടിയിലായ ഈ സംഘമാണെന്ന് പൊലീസ് അറിയിച്ചു.
ആലമ്പാടിയ്ക്ക് സമീപം പൊലീസ് നടത്തിയ വാഹന പരിശോധനക്കിടെയാണ് ഇവര്‍ പിടിയിലായത്. സംഘം സഞ്ചരിച്ച കാര്‍ പൊലീസ് കസ്റ്റഡിയില്‍ എടുത്തു. പ്രതികളെ കൂടുതല്‍ ചോദ്യം ചെയ്യുന്നതോടെ നിരവധി കവര്‍ച്ചാ കേസുകള്‍ക്ക് തുമ്പ് ലഭിക്കുമെന്ന പ്രതീക്ഷയിലാണ് പൊലീസ്.