മുംബൈ ഇന്ത്യന്‍സിനെതിരായ മത്സരത്തില്‍ 36 റണ്‍സിന് ജയിച്ചെങ്കിലും ലഖ്‌നൗ സൂപ്പര്‍ ജയന്റ്‌സ് നായകന്‍ കെ.എല്‍.രാഹുലിന് വന്‍ തിരിച്ചടി. ഈ സീസണില്‍ രണ്ടാം തവണയും കുറഞ്ഞ ഓവര്‍ നിരക്കിന്റെ പേരില്‍ പിഴയടയ്‌ക്കേണ്ടി വന്നിരിക്കുകയാണ് രാഹുലിന്. മുംബൈ ഇന്ത്യന്‍സിനെതിരായ മത്സരത്തില്‍ കുറഞ്ഞ ഓവര്‍ നിരക്കിന് 24 ലക്ഷം രൂപയാണ് രാഹുല്‍ പിഴയടയ്‌ക്കേണ്ടത്.
ഐപിഎല്‍ പെരുമാറ്റച്ചട്ടം അനുസരിച്ച് ഈ സീസണില്‍ ഒരിക്കല്‍ കൂടി കുറഞ്ഞ ഓവര്‍ നിരക്കിന് ശിക്ഷിക്കപ്പെട്ടാല്‍ ലഖ്‌നൗ നായകന്‍ കെ.എല്‍.രാഹുലിന് ഒരു കളിയില്‍ പുറത്തിരിക്കേണ്ടിവരും. സീസണില്‍ മൂന്ന് തവണ കുറഞ്ഞ ഓവര്‍ നിരക്കിന്റെ പേരില്‍ ശിക്ഷിക്കപ്പെട്ടാല്‍ ടീം നായകന്‍ ഒരു കളിയില്‍ വിലക്ക് നേരിടണമെന്നാണ് ഐപിഎല്‍ നിയമം. ഈ സീസണില്‍ ലീഗ് മത്സരങ്ങളില്‍ ആറ് കളികള്‍ കൂടി ലഖ്‌നൗവിന് ശേഷിക്കുന്നുണ്ട്. ഇതില്‍ ഏതെങ്കിലും ഒരു കളിയില്‍ കുറഞ്ഞ ഓവര്‍ നിരക്ക് വന്നാല്‍ കെ.എല്‍.രാഹുലിന് തിരിച്ചടിയാകും. മാത്രമല്ല മൂന്നാം തവണ സമാന കുറ്റത്തിനു ശിക്ഷിക്കപ്പെട്ടാല്‍ പിഴയടയ്‌ക്കേണ്ട തുക 30 ലക്ഷമാണ്.