ദൃശ്യം 2 പ്രേക്ഷകരിലേക്ക് എത്താന്‍ ഇനി മണിക്കൂറുകള്‍ മാത്രം. ദൃശ്യത്തിന് രണ്ടാംഭാഗം പ്രഖ്യാപിച്ചതു മുതലേ ആരാധകര്‍ ആവേശത്തിലായിരുന്നു.ഫെബ്രുവരി 19-ന് ആമസോണ്‍ പ്രൈമിലൂടെ ദൃശ്യം 2 റിലീസ് ചെയ്യുമ്പോള്‍ ജിത്തുജോസഫ് കൂട്ടുകാരും എന്തെല്ലാം സര്‍പ്രൈസുകള്‍ ഒരുക്കിയിട്ടുണ്ടെന്ന് നേരില്‍ തന്നെ കണ്ടറിയാം. ജോര്‍ജുകുട്ടിയെ കുടുക്കുവാന്‍ ഇത്തവണ മുരളി ഗോപിയും ഗണേഷ് കുമാറും അടക്കമുള്ള താരങ്ങള്‍ എത്തുന്നുവെന്നത് പുതിയ പ്രതീക്ഷകളാണ് നല്‍കുന്നത്.
അടുത്തിടെ പുറത്തുവന്ന ടീസര്‍, ട്രെയിലര്‍ എന്നിവയിലും ഒരു സര്‍പ്രൈസ് നിലനിര്‍ത്താന്‍ ടീമിനായി.ജോര്‍ജ്ജ്കുട്ടിയും കുടുംബവും ഇതുവരെയും പിടിക്കപ്പെട്ടിട്ടില്ലെന്നും വരുണ്‍ കേസ് ഇപ്പോഴും നാട്ടില്‍ ചര്‍ച്ച ചെയ്യുന്നുണ്ടെന്നും തുടങ്ങിയ വിവരങ്ങള്‍ നിര്‍മ്മാതാക്കള്‍ അടുത്തിടെ പുറത്തിറക്കിയ പ്രമോ വീഡിയോകളിലൂടെ നല്‍കി. മീന, ആശാ ശരത്, അന്‍സിബ, എസ്തര്‍ അനില്‍,സിദ്ദിഖ് തുടങ്ങിയ വലിയ താരനിര തന്നെ സിനിമയിലുണ്ട്.ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് സിനിമ നിര്‍മ്മിക്കുന്നത്.