ഏറെ രാഷ്ട്രീയ നാടകങ്ങൾക്കൊടുവിലാണ് യെദ്യൂരപ്പയെ മുഖ്യമന്ത്രിക്കസേരയിൽ നിന്നുമിറക്കി കുമാരസ്വാമി അവിടെയിരുന്നത്. ശനിയാഴ്ച നിയമസഭയില്‍ വിശ്വാസവോട്ടെടുപ്പിന് ഒരുങ്ങുന്ന കുമാരസ്വാമിയും അദ്ദേഹത്തിന്റെ പാർട്ടിയും ബിജെപിയും എല്ലാം ട്രെൻഡിങ്ങിൽ തന്നെയുണ്ട്. അതോടൊപ്പം, രാധിക കുമാരസ്വാമിയേയും എല്ലാവരും തിരയുന്നുണ്ട്.
കന്നഡ സിനിമയില്‍ വളരെ പോപ്പുലറായ നടിയും നിര്‍മ്മാതാവുമാണ് രാധിക കുമാരസ്വാമി. തെരഞ്ഞെടുപ്പുമായി ബന്ധപ്പെട്ട് രാധികയെ ഏവരും തിരയുന്നതിന്റെ കാരണം അവർ കുമാരസ്വാമിയുടെ രണ്ടാം ഭാര്യയാണെന്നതാണ്.
2006ലാണ് കുമാരസ്വാമിയും രാധികയും തമ്മില്‍ വിവാഹിതരാകുന്നത്. പക്ഷേ, ഇക്കാര്യം പുറം‌ലോകം അറിഞ്ഞത് 2010ലാണെന്ന് മാത്രം. ഷമിക കെ സ്വാമി ഇവരുടെ മകളാണ്. രാധികയെ വിവാഹം കഴിക്കുമ്പോള്‍ സ്വാമി അദ്ദേഹത്തിന്റെ ആദ്യഭാര്യയുമായുള്ള ബന്ധം വേര്‍പ്പെടുത്തിയിരുന്നില്ല. ഇതാണ് ഇപ്പോള്‍ കര്‍ണാടകയിലെ കുമാരസ്വാമി വിരുദ്ധര്‍ അദ്ദേഹത്തെ ചെളിവാരി തേയ്ക്കാന്‍ ഉപയോഗിക്കുന്നതും.
രത്തന്‍ കുമാറുമായുള്ള വിവാഹബന്ധം പരാജയപ്പെട്ടതിനെ തുടര്‍ന്നാണ് രാധിക കുമാരസ്വാമിയുമായി രഹസ്യവിവാഹം നടത്തിയത്.