അയോധ്യരാമക്ഷേത്ര ഉദ്ഘാടനത്തിലേക്കുള്ള ക്ഷണം നിരസിച്ച് അംബേദ്കറുടെ ചെറുമകന്‍ പ്രകാശ് അംബേദ്കര്‍. രാഷ്ട്രീയ പാര്‍ട്ടികള്‍ രാജ്യത്തിനും മുകളില്‍ വിശ്വാസപ്രമാണങ്ങള്‍ സ്ഥാപിച്ചാല്‍ അത് നമ്മുടെ സ്വാതന്ത്ര്യത്തെ അപകടത്തിലാക്കുമെന്ന് തന്റെ മുത്തച്ഛന്‍ മുന്നറിയിപ്പ് നല്‍കിയിരുന്നതായി പ്രകാശ് അംബേദ്കര്‍ പറഞ്ഞു. അയോധ്യരാമക്ഷേത്രത്തിലെ പ്രതിഷ്ഠാ ചടങ്ങിലേക്കുള്ള ക്ഷണം ലഭിച്ചതായി കഴിഞ്ഞ ദിവസമാണ് പ്രകാശ് അംബേദ്കര്‍ പറഞ്ഞത്. 22ന് നടക്കുന്ന പ്രാണപ്രതിഷ്ഠാ ചടങ്ങില്‍ ഞാന്‍ പങ്കെടുക്കില്ല. കാരണം ഇത് തിരഞ്ഞെടുപ്പ് നേട്ടങ്ങള്‍ക്കുവേണ്ടി ബിജെപി- ആര്‍എസ്എസ് എറ്റെടുത്തിരിക്കുകയാണ്. അതിനാല്‍ തന്നെ മുത്തച്ഛന്റെ മുന്നറിയിപ്പ് ഞാന്‍ മനസിലാക്കുന്നു. സോഷ്യല്‍ മീഡിയ പ്ലാറ്റ്‌ഫോമായ എക്‌സിലൂടെയാണ് പ്രകാശ് അംബേദ്കര്‍ ഇക്കാര്യം കുറിച്ചത്.
അയോധ്യ പ്രാണപ്രതിഷ്ഠാ ചടങ്ങിന് വലിയ പ്രചരണമാണ് ബിജെപി നല്‍കുന്നത്. കഴിഞ്ഞ ദിവസം നടനും എംപിയുമായ സുരേഷ് ഗോപിയുടെ മകളുടെ വിവാഹത്തിനെത്തിയ പ്രധാനമന്ത്രി നരേന്ദ്ര മോദി ചടങ്ങില്‍ പങ്കെടുത്ത പ്രമുഖര്‍ക്ക് അയോധ്യയിലെ അക്ഷതം നല്‍കിയിരുന്നു.