സി ബി ഐയുടെ വെബ്സൈറ്റ് തകര്‍ത്ത 'പാകിസ്ഥാന്‍ സൈബര്‍ ആര്‍മി' യെ കണ്ടെത്താനുള്ള അന്വേഷണം യൂറോപ്യന്‍ രാജ്യങ്ങളിലേക്ക് വ്യാപിപ്പിക്കുന്നു. വിശദമായ അന്വേഷണത്തിനായി സി ബി ഐയുടെ പ്രത്യേക സംഘത്തെ അങ്ങോട്ട് അയക്കാനും ധാരണയായി. അന്വേഷണം വിദേശത്തേക്ക് വ്യാപിപ്പിക്കാന്‍ അനുമതി തേടി സി ബി ഐ കോടതിയെ സമീപിച്ചു.
വെബ്സൈറ്റ് തകര്‍ക്കാന്‍ ഉപയോഗിച്ച കമ്പ്യൂട്ടറുകളുടെ ഐ പി അഡ്രസ് സി ബി ഐ കണ്ടെത്തിക്കഴിഞ്ഞു. ഇതില്‍ ഒരെണ്ണം ആമസോണ്‍ കമ്പനിയുടെ വെബ് സര്‍വീസാണെന്നും ബോധ്യമായിട്ടുണ്ട്. കമ്പ്യൂട്ടറുകളില്‍ ഒരെണ്ണം അമേരിക്കയിലെ പെന്‍സില്‍വാനിയയില്‍ നിന്നാണെന്നും കണ്ടെത്താനായി.
2010 ഡിസംബര്‍ മൂന്നിനാണ് സി ബി ഐ വെബ്സൈറ്റ് തകര്‍ക്കപ്പെട്ടത്. പാക് സൈബര്‍ ആര്‍മി എന്നാണ് അക്രമികള്‍ സ്വയം വിശേഷിപ്പിച്ചത്. തുടര്‍ന്ന് ജനുവരിയിലാണ് വെബ്സൈറ്റ് വീണ്ടും പ്രവര്‍ത്തനം ആരംഭിച്ചത്. അക്രമികള്‍ക്കെതിരെ ഐ ടി ആക്‍ടിലെ വകുപ്പുകള്‍ പ്രകാരമാണ് കേസ് രജിസ്റ്റര്‍ ചെയ്തിരിക്കുന്നത്.