പ്രധാനമന്ത്രി നരേന്ദ്ര മോദിയുടെ സൊമാലിയന്‍ പരാമര്‍ശത്തിനെതിരെ വിമര്‍ശനങ്ങള്‍ തുടരുന്നതിനിടെ മുഖ്യമന്ത്രിയെയും സൊമാലിയന്‍ കടൽകൊള്ളക്കാരോട് ഉപമിച്ച് പ്രതിപക്ഷ നേതാവ് വി എസ് അച്യുതാനന്ദന്‍ രംഗത്ത്. കേരളം സൊമാലിയ അല്ല. എന്നാല്‍ മുഖ്യമന്ത്രിയും കൂട്ടുകാരും സൊമാലിയന്‍ കടല്‍ക്കൊള്ളക്കാരെ പോലും നാണിപ്പിക്കുന്നു. ഓണത്തിനിടയ്ക്ക് പുട്ടുകച്ചവടം പോലെ സൊമാലിയ ആയുധമാക്കി രണ്ട് വോട്ടുതട്ടാനായി ഉമ്മന്‍ ചാണ്ടി രംഗത്തെത്തിയിട്ടുണ്ടെന്നും ഫേസ്ബുക്കില്‍ പോസ്റ്റ് ചെയ്ത കുറിപ്പില്‍ വി എസ് കുറ്റപ്പെടുത്തുന്നു.
വി എസിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം-
കേരളം സൊമാലിയ അല്ല, തീർച്ച;
പക്ഷേ, ഉമ്മൻ ചാണ്ടിയും കൂട്ടാളികളും സൊമാലിയൻ കടൽകൊള്ളക്കാരെ പോലും നാണിപ്പിക്കുന്നു.
പ്രധാനമന്ത്രി ശ്രീ നരേന്ദ്രമോഡി കേരളത്തെ നന്നാക്കാനായി ഇറങ്ങി പുറപ്പെട്ടിരിക്കുകയാണ്. അദ്ദേഹം പ്രധാനമന്ത്രി ആയിട്ട് രണ്ട് വർഷം ആയി. കേരളത്തിന്റെ നിലനില്പിന് അടിയന്തരമായി ആവശ്യം വേണ്ട കാര്യങ്ങൾ ഗവന്മെന്റും പ്രതിപക്ഷവും അദ്ദേഹത്തിന്റെ മുമ്പാകെ നിരന്തരം അവതരിപ്പിച്ചുകൊണ്ടിരിക്കുകയാണ്. എല്ലാം ചെയ്യും എന്ന് പറയുന്നതല്ലാതെ ഇതവരെ ഒരു കാര്യവും അദ്ദേഹം കേരളത്തിന് വേണ്ടി ചെയ്തിട്ടില്ല.
കുറച്ച് ദിവസം മുമ്പ് ഒരു പോസ്റ്റിൽ നരേന്ദ്ര മോഡി നടത്തിയ ഇത്തരം വാഗ്ദാന ലംഘനങ്ങളുടെ പട്ടിക ഞാൻ നിരത്തിയിരുന്നു. അതിന് ബി.ജെ.പി.യുടെയൊ ആർ.എസ്.എസ് -ന്റെയൊ ഒരു മറുപടിയും ലഭിച്ചിട്ടില്ല.
നരേന്ദ്രമോഡി ഇപ്പോൾ കേരളത്തെ സൊമാലിയയോട് ഉപമിച്ചിരിക്കുകയാണ്. ശിശു മരണനിരക്ക് കേരളത്തെക്കാൾ മെച്ചമാണ് സൊമാലിയയുടെത് എന്നാണ് അദ്ദേഹത്തിന്റെ കണ്ടുപിടിത്തം. ഇത് തീർത്തും വസ്തുതാ വിരുദ്ധമാണ്. ലോകമെമ്പാടും പുകഴ്ത്തപ്പെടുന്ന ഒരു വികസന മാതൃകയാണ് കേരളത്തിന്റേത്. ഇങ്ങനെ ഒരു മാതൃക ഇവിടെ സൃഷ്ടിച്ചെടുക്കാൻ അടിത്തറ ഒരുക്കിയത് ഇടതുപക്ഷ സർക്കാരുകളാണ്. ആകൊണ്ട് ഞാൻ നരേന്ദ്ര മോഡിയോട് പറയുന്നു കേരളവും സോമാലിയയും തമ്മിൽ യാതൊരു സാമ്യവുമില്ല. എന്തിന് നിങ്ങളുടെ ഗുജറാത്തിനെക്കാൾ ജീവിതനിലവാര മേഖലകളിൽ എത്രയോ മുകളിലാണ് കേരളം.
ഓണത്തിനിടയിൽ പുട്ടുകച്ചവടം എന്ന പോലെ സൊമാലിയ ആയുധമാക്കി രണ്ട് വോട്ട് തട്ടാനായി മുഖ്യമന്ത്രി ഉമ്മൻ ചാണ്ടി പതിവ് പോലെ രംഗത്ത് എത്തിയിട്ടുണ്ട്. കേരളത്തെ ഗുജറാത്താക്കാനുള്ള മോഡിയുടെ തന്ത്രം നടപ്പിലാക്കി കൊണ്ടിരിക്കുന്ന ആർ.എസ്.എസ്. കിങ്കരനാണ് ഉമ്മൻ ചാണ്ടി. ഉമ്മൻ ചാണ്ടിയുടെ ഈ ഗുജറാത്ത് മോഡൽ നടപ്പിലാക്കിയാൽ കേരളത്തിലെ സാമൂഹ്യ അന്തരീക്ഷം രക്തപങ്കിലമാകും.
ശ്രീമാൻ ഉമ്മൻ ചാണ്ടി, കേരളം സൊമാലിയ അല്ലെങ്കിലും നിങ്ങൾക്കും കൂട്ടാളികൾക്കും സൊമാലിയൻ കടൽകൊള്ളക്കാരുടെ ഒരു ഛായ ഇല്ലേ? അല്ല നിങ്ങൾ അവരെയും നാണിപ്പിക്കുന്നുണ്ടാവാം!