കൊച്ചിയിലെ പുതുവത്സരാഘോഷങ്ങള്‍ അതിരുവിടാതിരിക്കാന്‍ കര്‍ശന നടപടിയുമായി പൊലീസ്. രാത്രി 12 മണിയോടെ ആഘോഷപരിപാടികള്‍ അവസാനിപ്പിക്കണമെന്നാണ് നിര്‍ദേശം. നഗരത്തിലും ആഘോഷം നടക്കുന്ന ഫോര്‍ട്ട് കൊച്ചിയിലും കര്‍ശന പരിശോധനയുണ്ടാകും.
ജില്ലാ അതിര്‍ത്തികള്‍ക്ക് പുറമേ ഫോര്‍ട്ട് കൊച്ചി, മട്ടാഞ്ചേരി ഭാഗങ്ങളിലും കര്‍ശന പരിശോധന ഉറപ്പാക്കും. മദ്യപിച്ചു വാഹനമോടിക്കുന്നവര്‍ക്കും സ്ത്രീകളെ ശല്യം ചെയ്യുന്നവര്‍ക്കും പൊലീസിന്റെ പിടിവീഴും. ഹോട്ടലുകളില്‍ തിരിച്ചറിയല്‍ രേഖ പരിശോധിച്ച ശേഷമേ പാര്‍ട്ടികളില്‍ പ്രവേശനം അനുവദിക്കൂ.