ദേശീയ പതാക ഉയര്‍ത്താൻ ആര്‍എസ്എസ് നേതാവ് മോഹന്‍ ഭഗവത് വീണ്ടും പാലക്കാട്ട് എത്തും. റിപ്പബ്‌ളിക്ക് ദിനത്തില്‍ ആര്‍എസ്എസ് ക്യാമ്പില്‍ പങ്കെടുക്കുന്നതിനായി ജില്ലയിൽ എത്തുന്ന അദ്ദേഹം ഒരു സ്വകാര്യ സ്‌കൂളിൽ പതാക ഉയർത്തുമെന്നാണ് പിടിഐ റിപ്പോർട്ട് ചെയ്യുന്നത്.
പാലക്കാട്ടെ ഭാരതീയ വിദ്യാ നികേതന്റെ നിയന്ത്രണത്തിലുള്ള സ്‌കൂളിലാണ് മൂന്ന് ദിവസത്തെ ആര്‍എസ്എസ് ക്യാമ്പ് നടക്കുന്നത്. ഈ സ്‌കൂളിലാകും മോഹന്‍ ഭഗവത് പതാക ഉയർത്തുക. ആര്‍എസ്എസ് ബന്ധമുള്ള സ്‌കൂളാണ് പാലക്കാട്ടെ ഭാരതീയ വിദ്യാ നികേതൻ.
ആര്‍എസ്എസ് സംസ്ഥാന നേതാവ് കെകെ ബല്‍റാമിനെ ഉദ്ധരിച്ചാണ് ഈ വാർത്ത പുറത്തുവന്നത്. നേരത്തെ സ്വാതന്ത്ര്യദിനത്തില്‍ മോഹന്‍ ഭഗവത് പാലക്കാട് മൂത്താംതറ കണ്ണകിയമ്മന്‍ ഹയര്‍സെക്കന്‍ഡറി സ്‌കൂളിൽ പതാക ഉയർത്തിയത് വിവാദമായിരുന്നു.