മദ്യപാനത്തിനിടെയുണ്ടായ വഴക്കില്‍ വൃദ്ധനെ മകനും വൃദ്ധന്‍റെ അനുജനും ചേര്‍ന്ന് വെട്ടികൊലപ്പെടുത്തി. വെള്ളനാട് കണ്ണമ്പള്ളി കുറിഞ്ഞിലക്കോട് സന്തോഷ് ഭവനില്‍ മണിയന്‍ എന്ന 65 കാരനാണു കൊല്ലപ്പെട്ടത്.
ഇതുമായി ബന്ധപ്പെട്ട് മണിയന്‍റെ സഹോദരന്‍ കല്ലുവരമ്പ് അരുവിക്കാ മൂഴിയില്‍ മുരളി (52), മണിയന്‍റെ മകന്‍ ശ്രീകുമാര്‍ എന്ന 25 കാരന്‍ എന്നിവരെയാണു പൊലീസ് അറസ്റ്റ് ചെയ്തത്. വ്യാഴാഴ്ച ഉച്ച തിരിഞ്ഞാണു സംഭവം നടന്നതെന്ന് ആര്യനാട് പൊലീസ് അറിയിച്ചു.
ശ്രീകുമാറിന്‍റെ സഹോദരന്‍ സന്തോഷിനു വീടു വയ്ക്കുന്നതിനായി വീട്ടു വളപ്പിലെ മുള, വാഴ എന്നിവ വെട്ടുന്നതുമായി ബന്ധപ്പെട്ട് മണിയനും ശ്രീകുമാറും തമ്മില്‍ വഴക്കുകൂടുകയും തുടര്‍ന്ന് ഇരുവരും തമ്മില്‍ തമ്മില്‍ കത്തിക്കുത്ത് നടത്തുകയും ചെയ്തു.
തുടര്‍ന്ന് ഇരുവരും പരസ്പരം വെട്ടുകയും വെട്ടേറ്റ് മണിയന്‍ വീഴുകയും ഭാര്യ ഉഷ ഇയാളെ ആശുപത്രിയിലേക്ക് കൊണ്ടുപോവുകയും ചെയ്തു. എന്നാല്‍ വഴിയില്‍ വച്ച് മണിയന്‍ മരിച്ചു. വെട്ടേറ്റ ശ്രീകുമാര്‍ ആശുപത്രിയിലെത്തി മരുന്നു വച്ച് മടങ്ങുമ്പോഴാണ് പൊലീസ് പിടിയിലായത്. എന്നാല്‍ സംഭവത്തില്‍ മണിയന്‍റെ സഹോദരന്‍ മുരളിക്കും പങ്കുണ്ടെന്ന് കണ്ടാണ് പൊലീസ് ഇയാളെയും അറസ്റ്റ് ചെയ്തത്.