തിരുവനന്തപുരം മെഡിക്കല്‍ കോളേജിലെ യുവ ഡോക്ടറെ ഫ്‌ളാറ്റില്‍ മരിച്ച നിലയില്‍ കണ്ടെത്തിയ സംഭവത്തില്‍ ആരോഗ്യമന്ത്രി വീണാ ജോര്‍ജ് അന്വേഷണത്തിന് ഉത്തരവിട്ടു. സുഹൃത്തായ ഡോക്ടര്‍ സ്ത്രീധനത്തിന്റെ പേരില്‍ വിവാഹത്തില്‍ നിന്നും പിന്മാറിയതിന് പിന്നാലെയാണ് 26കാരിയായ ഡോ ഷഹന ആത്മഹത്യ ചെയ്തതെന്നാണ് കുടുംബത്തിന്റെ ആരോപണം. ഇതിന് പിന്നാലെയാണ് സംഭവത്തില്‍ റിപ്പോര്‍ട്ട് നല്‍കാന്‍ ശിശുവികസന ഡയറക്ടര്‍ക്ക് ആരോഗ്യമന്ത്രി നിര്‍ദേശം നല്‍കിയത്.
തിരുവനന്തപുരം മെഡിക്കല്‍ കോളേജ് സര്‍ജറി വിഭാഗത്തിലെ പിജി വിദ്യാര്‍ഥിനിയും വെഞ്ഞാറമൂട് സ്വദേശിനിയുമായ ഷഹന രാത്രി ഡ്യൂട്ടിക്ക് കയറേണ്ട സമയമായിട്ടും എത്താതിരുന്നതിനെ തൂടര്‍ന്ന് നടത്തിയ പരിശോധനയിലാണ് ഇവരെ മുറിയില്‍ മരിച്ച നിലയില്‍ കണ്ടെത്തിയത്. മുറിയില്‍ നിന്നും ആത്മഹത്യാക്കുറിപ്പും പോലീസ് കണ്ടെത്തി. എല്ലാവര്‍ക്കും വേണ്ടത് പണമാണ്. പണമാണ് എല്ലാത്തിലും വലുത് എന്നാണ് കുറിപ്പില്‍ എഴുതിയിരുന്നത്.
സുഹൃത്തായ ഡോക്ടറുമായി ഷഹന പ്രണയത്തിലായിരുന്നു. ഇതിനെ തുടര്‍ന്ന് വീട്ടുകാര്‍ വിവാഹം ഉറപ്പിച്ചെങ്കിലും സ്ത്രീധനമായി 150 പവനും 15 ഏക്കര്‍ ബ്ജൂമിയും ബിഎംഡബ്യു കാറും വരന്‍ ആവശ്യപ്പെട്ടിരുന്നു. സ്ത്രീധനത്തിന്റെ പേരില്‍ വിവാഹത്തില്‍ നിന്നും യുവാവ് പിന്മാറിയതോടെയാണ് ഷഹന ആത്മഹത്യ ചെയ്തതെന്ന് കുടുംബം ആരോപിക്കുന്നു. സംഭവത്തില്‍ അസ്വാഭാവിക മരണത്തിന് കേസെടുത്ത് പോലീസ് അന്വേഷണം ആരംഭിച്ചു.