ഐ പി എല്ലിന്‍റെ ചരിത്രത്തില്‍ 20 ഓവറും ബാറ്റ് ചെയ്‌ത് ഒരു ടീം നേടുന്ന ഏറ്റവും കുറഞ്ഞ സ്‌കോറില്‍ കൊല്‍ക്കത്ത നൈറ്റ് റൈഡേഴ്‌സ് ഒതുങ്ങിയപ്പോള്‍ എട്ട് വിക്കറ്റ് ജയം നേടി റോയല്‍ ചലഞ്ചേഴ്‌സ് ബാംഗ്ലൂര്‍ മികവുകാട്ടി. ആദ്യം ബാറ്റ് ചെയ്‌ത കൊല്‍ക്കത്ത എട്ടുവിക്കറ്റ് നഷ്‌ടത്തില്‍ 84 റണ്‍സ് മാത്രമാണ് എടുത്തത്.
മറുപടി ബാറ്റിംഗിനിറങ്ങിയ ബാംഗ്ലൂര്‍ ആകട്ടെ 13.3 ഓവറില്‍ രണ്ട് വിക്കറ്റ് നഷ്‌ടത്തില്‍ 85 റണ്‍സ് നേടി വിജയം കുറിച്ചു. ബാംഗ്ലൂരിനുവേണ്ടി ദേവ്‌ദത്ത് പടിക്കല്‍ (25), ആരോണ്‍ ഫിഞ്ച് (16), ഗുര്‍കീരത് സിംഗ് ( പുറത്താകാതെ 21), നായകന്‍ വിരാട് കോലി (പുറത്താകാതെ 18) എന്നിവര്‍ മികച്ച രീതിയില്‍ ബാറ്റുവീശി.
ആദ്യം ബാറ്റ് ചെയ്‌ത കൊല്‍ക്കത്തയുടെ അന്തകനായത് മുഹമ്മദ് സിറാജാണ്. നാല് ഓവറുകളില്‍ എട്ട് റണ്‍സ് മാത്രം വിട്ടുകൊടുത്ത് മൂന്നുവിക്കറ്റുകള്‍. യുസ്‌വേന്ദ്ര ചാഹല്‍ രണ്ടുവിക്കറ്റുകള്‍ വീഴ്‌ത്തി.
30 റണ്‍സെടുത്ത നായകന്‍ ഒയിന്‍ മോര്‍ഗന്‍ മാത്രമാണ് കൊല്‍ക്കത്ത നിരയില്‍ ഭേദപ്പെട്ട ബാറ്റിംഗ് പ്രകടനം പുറത്തെടുത്തത്.