19-ാം ഓവര്‍ ശിവം ദുബെയ്ക്ക് കൊടുക്കാനുള്ള തീരുമാനം ധോണിയുടേത് തന്നെ !

ലഖ്‌നൗ സൂപ്പര്‍ ജയന്റ്‌സിനെതിരായ മത്സരത്തില്‍ ചെന്നൈ സൂപ്പര്‍ കിങ്‌സിന്റെ തോല്‍വിക്ക് കാരണമായത് ശിവം ദുബെ എറിഞ്ഞ ഒരു ഓവറാണ്. ലഖ്‌നൗ ബാറ്റ് ചെയ്യുമ്പോള്‍ 19-ാം ഓവറാണ് ദുബെ എറിഞ്ഞത്. 12 പന്തില്‍ അപ്പോള്‍ ലഖ്‌നൗവിന് ജയിക്കാന്‍ വേണ്ടിയിരുന്നത് 34 റണ്‍സാണ്. 19-ാം ഓവറില്‍ ദുബെ 25 റണ്‍സ് വിട്ടുകൊടുത്തതോടെ കാര്യങ്ങള്‍ ലഖ്‌നൗവിന്റെ വരുതിയിലായി. താരതമ്യേന അനുഭവസമ്പത്ത് കുറഞ്ഞ ശിവം ദുബെയ്ക്ക് നിര്‍ണായകമായ 19-ാം ഓവര്‍ എറിയാന്‍ നല്‍കിയത് മഹേന്ദ്രസിങ് ധോണിയാണ്. നായകന്‍ രവീന്ദ്ര ജഡേജ ബൗണ്ടറി ലൈനിന് അരികെ ഫീല്‍ഡ് ചെയ്യുകയായിരുന്നു. അവസാന നാല് ഓവറിലേക്ക് മത്സരം എത്തിയപ്പോള്‍ ബൗളിങ് ചെയ്ഞ്ചില്‍ ജഡേജ കാര്യമായി ഇടപെട്ടിരുന്നില്ല. ആ സമയത്ത് കടിഞ്ഞാണ്‍ ധോണിയുടെ കൈകളിലായിരുന്നു. ദുബെയ്ക്ക് പന്തെറിയാന്‍ നല്‍കിയത് നൂറ് ശതമാനം ധോണിയുടെ തീരുമാനമായിരുന്നെന്നാണ് ചെന്നൈ ഫ്രാഞ്ചൈസിയുമായി ബന്ധപ്പെട്ട വൃത്തങ്ങള്‍ റിപ്പോര്‍ട്ട് ചെയ്യുന്നത്.