Elon Musk Exits Donald Trump Government: 'എന്റെ സമയം അവസാനിച്ചു'; ട്രംപ് സര്‍ക്കാരുമായുള്ള ബന്ധത്തിനു ഫുള്‍സ്റ്റോപ്പിട്ട് ഇലോണ്‍ മസ്‌ക്; തര്‍ക്കം?

Elon Musk and Donald Trump

Elon Musk Exits Donald Trump Government: യുഎസിലെ ഡൊണാള്‍ഡ് ട്രംപ് സര്‍ക്കാരുമായുള്ള ബന്ധം അവസാനിപ്പിച്ച് ശതകോടീശ്വരനും ടെസ്ല സിഇഒയുമായ ഇലോണ്‍ മസ്‌ക്. യുഎസ് സര്‍ക്കാരിന്റെ പ്രത്യേക സര്‍ക്കാര്‍ ഏജന്‍സിയായ ഡോജില്‍ (ഡിപ്പാര്‍ട്‌മെന്റ് ഓഫ് ഗവര്‍ണമെന്റ് എഫിഷ്യന്‍സി - DOGE) നിന്ന് മസ്‌ക് പടിയിറങ്ങി. മസ്‌ക് ഡോജിന്റെ തലവനായി സേവനം അനുഷ്ഠിച്ചുവരികയായിരുന്നു. 

ഡോജിലെ തന്റെ സമയം അവസാനിക്കുന്നുവെന്നും ഒരു പ്രത്യേക സര്‍ക്കാര്‍ ജീവനക്കാരന്‍ എന്ന നിലയില്‍ തന്റെ കടമ നിര്‍വഹിച്ചുവെന്നും മസ്‌ക് പറഞ്ഞു. ട്രംപിന് നന്ദി അറിയിച്ചാണ് മസ്‌കിന്റെ പടിയിറക്കം. ഡോജ് ദൗത്യം കാലക്രമേണ യുഎസിന്റെ ഭരണകാര്യങ്ങളില്‍ ശക്തിപകരുമെന്നും മസ്‌ക് പറഞ്ഞു. 

അതേസമയം മസ്‌കും ട്രംപും തമ്മില്‍ അഭിപ്രായ ഭിന്നതകള്‍ ഉള്ളതായി രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നു. ട്രംപുമായുള്ള ഭിന്നതയെ തുടര്‍ന്നാണ് ഡോജില്‍ തുടരാന്‍ മസ്‌ക് ആഗ്രഹിക്കാത്തതെന്നാണ് വിവരം. കഴിഞ്ഞ ദിവസം ട്രംപിന്റെ താരിഫ് നയങ്ങള്‍ക്കെതിരെ മസ്‌ക് പരോക്ഷ വിമര്‍ശനം ഉന്നയിച്ചിരുന്നു. ചെലവ് ബില്‍ വര്‍ധിക്കുന്നത് ബജറ്റ് കമ്മി വര്‍ധിപ്പിക്കുകയും ഡോജ് ടീമിന്റെ പ്രവര്‍ത്തനങ്ങളെ ദുര്‍ബലപ്പെടുത്തുകയും ചെയ്യുന്നതായി മസ്‌ക് വിമര്‍ശിച്ചിരുന്നു.