നിഖില്‍ സിദ്ധാര്‍ത്ഥയുടെ 'സ്പൈ' പ്രദര്‍ശനം തുടരുകയാണ്. സമ്മിശ്ര പ്രതികരണങ്ങളാണ് ചിത്രത്തിന് ലഭിച്ചത്. ബഹുഭാഷാ റിലീസായി എത്തിയ ചിത്രത്തിന് ഇന്ത്യയിലുടനീളമുള്ള കൂടുതല്‍ തിയേറ്ററുകളില്‍ പ്രദര്‍ശിപ്പിക്കാന്‍ ആവാത്തതില്‍ നിരാശയിലാണ് നിഖില്‍. ഇതില്‍ ഹിന്ദി, കന്നഡ, തമിഴ്, മലയാളം പ്രേക്ഷകരോട് ക്ഷമ ചോദിച്ചിരിക്കുകയാണ് നടന്‍. ഇനി വരാനിരിക്കുന്ന തന്റെ സിനിമകള്‍ക്ക് എല്ലാം എല്ലാ ഭാഷകളിലും ശരിയായ റിലീസ് ഉണ്ടാകുമെന്ന് നിഖില്‍ ഉറപ്പു നല്‍കി.
വിദേശത്ത് 350 തെലുങ്ക് പ്രീമിയര്‍ ഷോകള്‍ റദ്ദാക്കേണ്ടി വന്നതിലുള്ള വിഷമവും നിഖില്‍ മറച്ചുവെച്ചില്ല.'സ്പൈ' ഇന്ത്യയിലുടനീളം വൈഡ് റിലീസ് ചെയ്യാന്‍ സാധിച്ചില്ലെങ്കിലും തന്റെ കരിയറിലെ മികച്ച ഓപ്പണിംഗ് സമ്മാനിച്ച ആരാധകരോട് നടന്‍ നന്ദിയും പറഞ്ഞു.
ഐശ്വര്യ മേനോന്‍, മകരന്ദ് ദേശ്പാണ്ഡെ, അഭിനവ് ഗോമഠം തുടങ്ങിയ താരങ്ങള്‍ സ്‌പൈയില്‍ അഭിനയിക്കുന്നു. കെ രാജശേഖര്‍ റെഡ്ഡി തിരക്കഥയെഴുതിയ സിനിമ സംവിധാനം ചെയ്തത് ഗാരി ബിഎച്ച് ആണ്. ശ്രീചരണ്‍ ആണ് സംഗീതം.