'അത് വല്ലാത്തൊരു സിനിമയാണ്'; മമ്മൂട്ടി-മഹേഷ് നാരായണന്‍ ചിത്രത്തിന്റെ കഥയെ കുറിച്ച് ജോബി ജോര്‍ജ്, മോഹന്‍ലാല്‍ ഉണ്ടെന്നും വെളിപ്പെടുത്തല്‍

Joby George, Mohanlal, Mammootty and Mahesh Narayanan

മമ്മൂട്ടിയെ നായകനാക്കി മഹേഷ് നാരായണന്‍ സംവിധാനം ചെയ്യാന്‍ പോകുന്ന ചിത്രത്തെ കുറിച്ച് കൂടുതല്‍ വെളിപ്പെടുത്തലുകളുമായി നിര്‍മാതാവ് ജോബി ജോര്‍ജ്. ഈ സിനിമയുടെ കഥ പൂര്‍ണമായി താന്‍ കേട്ടതാണെന്നും വല്ലാത്തൊരു സിനിമയാണ് അതെന്നും ജോബി ജോര്‍ജ് പറഞ്ഞു. ഈ സിനിമ നിര്‍മിക്കാന്‍ ആദ്യം ആലോചിച്ചിരുന്നത് തന്റെ പ്രൊഡക്ഷന്‍ കമ്പനിയായ ഗുഡ്‌വില്‍ എന്റര്‍ടൈന്‍മെന്റ്‌സ് ആയിരുന്നെന്നും പിന്നീട് അത് നടക്കാതെ പോയതാണെന്നും ജോബി ജോര്‍ജ് ഒരു അഭിമുഖത്തില്‍ പറഞ്ഞു. 

' ഞാന്‍ സ്‌ക്രിപ്റ്റ് മുഴുവനും കേട്ടത് ഇനി മമ്മൂക്കയുടെ വരാന്‍ പോകുന്ന പടമാണ്. അത് ഞാനല്ല പ്രൊഡ്യൂസ് ചെയ്യുന്നത്. പക്ഷേ, മഹേഷ് നാരായണന്‍ - മമ്മൂട്ടി - മോഹന്‍ലാല്‍ ചിത്രത്തിന്റെ സ്‌ക്രിപ്റ്റ് കേട്ടതാണ്. അതൊരു ബ്രില്ല്യന്റ് മൂവിയാണ്. അത് വല്ലാത്തൊരു സിനിമയാകുമെന്നാണ് ഞാന്‍ കരുതുന്നത്. ഞാന്‍ അത് മൊത്തമായി ഇരുന്ന് കേട്ട കഥയാണ്. ആ സിനിമ ചെയ്യണമെന്ന ആഗ്രഹം ഞങ്ങള്‍ക്കുണ്ടായിരുന്നു. പക്ഷേ ഞാന്‍ പറയാറില്ലേ, ചില സിനിമകള്‍ സംഭവിക്കുന്നതാണ്, നിമിത്തങ്ങളാണ്,' ജോബി ജോര്‍ജ് പറഞ്ഞു. 

മഹേഷ് നാരായണന്‍-മമ്മൂട്ടി ചിത്രത്തില്‍ സൂപ്പര്‍താരം മോഹന്‍ലാല്‍ ശ്രദ്ധേയമായ ഒരു വേഷം അവതരിപ്പിക്കുന്നുണ്ടെന്ന് നേരത്തെ റിപ്പോര്‍ട്ടുകളുണ്ടായിരുന്നു. ശ്രീലങ്കയിലാണ് ഈ സിനിമയുടെ പ്രധാന ചിത്രീകരണം. ഫഹദ് ഫാസില്‍, കുഞ്ചാക്കോ ബോബന്‍ എന്നിവരും ചിത്രത്തില്‍ ഉണ്ടെന്നാണ് വാര്‍ത്തകള്‍. അടുത്ത വര്‍ഷമായിരിക്കും ചിത്രീകരണം ആരംഭിക്കുക. ഔദ്യോഗിക പ്രഖ്യാപനം ഉടനുണ്ടാകും.