ഭുവനേശ്വര്‍: ഒഡീഷയില്‍ പെണ്‍കുട്ടിയെ തട്ടിക്കൊണ്ട് പോയി കൂട്ടബലാത്സംഗത്തിനിരയാക്കി. ഭുവനേശ്വറിലാണ് സംഭവം ഉണ്ടായത്. മൂന്നംഗ സംഘം പെൺകുട്ടിയെ തട്ടിക്കൊണ്ടുപോയ ശേഷം കാട്ടിലെത്തിച്ച് കത്തികാട്ടി കൂട്ടബലാത്സംഗത്തിന് ഇരയാക്കുകയായിരുന്നു. ക്രൂരമായി പീഡിപ്പിച്ച ശേഷം അക്രമികൾ പെൺകുട്ടിയെ കാട്ടിൽ ഉപേക്ഷിക്കുകയായിരുന്നു എന്ന് പൊലീസ് പറഞ്ഞു.
തട്ടിക്കോണ്ടുപോകുന്ന സമയത്ത് പെൺകുട്ടിയോടൊപ്പം ഉണ്ടായിരുന്ന സുഹൃത്തായ മറ്റൊരു പെൺകുട്ടിയാണ് വിവരം ബന്ധുക്കളെയും നാട്ടുകാരെയും അറിയിച്ചത്. ഇതോടെ ബന്ധുക്കളും നാട്ടുകാരും ചേർന്ന് കാട്ടിൽ നടത്തിയ പരിശോധനയിലാണ് പെൺകുട്ടിയെ കണ്ടെത്താനായത്.
പെൺകുട്ടിയെ ഉടൻ തന്നെ ഭുവനേശ്വറിലെ ആശുപത്രിയിൽ പ്രവേശിപ്പിച്ചു. സംഭവത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. അക്രമി സംഘത്തെക്കുറിച്ച് പൊലീസിന് വിവരങ്ങൾ ഒന്നുംതന്നെ ലഭിച്ചിട്ടില്ല.