Virat Kohli Injury Update: നാഗ്പൂര്‍ ഏകദിനത്തില്‍ പരുക്കിനെ തുടര്‍ന്ന് പുറത്തിരുന്ന വിരാട് കോലി ഞായറാഴ്ച കട്ടക്കില്‍ നടക്കുന്ന രണ്ടാം ഏകദിനം കളിക്കും. വലത് കാല്‍മുട്ടിലെ നീരിനെ തുടര്‍ന്നാണ് കോലിക്ക് ആദ്യ ഏകദിനം നഷ്ടമായത്. കോലിയുടെ പരുക്ക് അത്ര ഗുരുതരമല്ലെന്നും കട്ടക്കില്‍ കളിക്കുമെന്നുമാണ് ഇന്ത്യന്‍ ടീമുമായി അടുത്ത വൃത്തങ്ങള്‍ വ്യക്തമാക്കുന്നത്.
കോലി പ്ലേയിങ് ഇലവനില്‍ എത്തുമ്പോള്‍ ആരെ പുറത്തിരുത്തുമെന്ന ചോദ്യമാണ് മുഖ്യ പരിശീലകന്‍ ഗൗതം ഗംഭീറിനു തലവേദന. കോലിക്കു പകരക്കാരനായി ഒന്നാം ഏകദിനത്തില്‍ കളിച്ച ശ്രേയസ് അയ്യര്‍ മികച്ച പ്രകടനം കാഴ്ചവെച്ചിരുന്നു. അതുകൊണ്ട് തന്നെ ശ്രേയസിനെ പുറത്തിരുത്താന്‍ ഗംഭീര്‍ തയ്യാറാകില്ല. ആദ്യ ഏകദിനത്തില്‍ ഓപ്പണറായിരുന്ന യുവതാരം യശസ്വി ജയ്‌സ്വാള്‍ ആയിരിക്കും കോലിക്കു വേണ്ടി വഴിമാറിക്കൊടുക്കുക. ശുഭ്മാന്‍ ഗില്‍ രോഹിത് ശര്‍മയ്‌ക്കൊപ്പം ഓപ്പണ്‍ ചെയ്യും. കോലി വണ്‍ഡൗണ്‍ ആയും ശ്രേയസ് നാലാമനായും ക്രീസിലെത്തും.