ദക്ഷിണാഫ്രിക്കയ്‌ക്കെതിരായ ആദ്യ ടെസ്റ്റില്‍ ന്യൂസിലന്‍ഡിന് കൂറ്റന്‍ സ്‌കോര്‍. ഇരട്ടസെഞ്ചുറി നേടിയ രചിന് രവീന്ദ്രയുടെയും സെഞ്ചുറിയുമായി തിളങ്ങിയ കെയ്ന്‍ വില്യംസണിന്റെയും പ്രകടനമികവിലാണ് ന്യൂസിലന്‍ഡ് 511 റണ്‍സ് അടിച്ചുകൂട്ടിയത്. 366 പന്തില്‍ 26 ഫോറും 3 സിക്‌സും സഹിതം 240 റണ്‍സാണ് രചിന് രവീന്ദ്ര സ്വന്തമാക്കിയത്. ഇതോടെ കന്നി ടെസ്റ്റ് സെഞ്ചുറി തന്നെ ഇരട്ടസെഞ്ചുറിയാക്കാന്‍ രചിന് സാധിച്ചു.
രചിനെ കൂടാതെ കെയ്ന്‍ വില്യംസണും ന്യൂസിലന്‍ഡിനായി സെഞ്ചുറി നേടി. 289 പന്തില്‍ 16 ഫോറടക്കം 118 റണ്‍സാണ് വില്യംസണ് നേടിയത്. ടെസ്റ്റ് ക്രിക്കറ്റില്‍ വില്യംസണിന്റെ മുപ്പതാമത് സെഞ്ചുറിയാണിത്. നാലാം വിക്കറ്റില്‍ 232 റണ്‍സാണ് നാലാം വിക്കറ്റില്‍ ഇവര്‍ കൂട്ടിചേര്‍ത്തത്. ഇരുവരെയും കൂടാതെ 39 റണ്‍സെടുത്ത ഗ്ലെന്‍ ഫിലിപ്‌സാണ് ടീമിലെ മൂന്നാമത് ടോപ് സ്‌കോറര്‍.
ദക്ഷിണാഫ്രിക്കയ്ക്കായി ക്യാപ്റ്റന്‍ നെയ്ല്‍ ബ്രാന്‍ഡ് 6 വിക്കറ്റ് നേടി. 26 ഓവറില്‍ 119 റണ്‍സ് വഴങ്ങിയാണ് നെയ്ല്‍ ബ്രാന്‍ഡ് 6 വിക്കറ്റ് നേടിയത്. സ്വാര്‍ദത്ത് 2 വിക്കറ്റും മോര്‍ക്കിയും പാറ്റേഴ്‌സണും ഓരോ വിക്കറ്റും നേടി,സൗത്താഫ്രിക്ക ടി20 ലീഗ് നടക്കുന്നതിനാല്‍ പ്രധാനതാരങ്ങളില്ലാതെയാണ് ദക്ഷിണാഫ്രിക്ക ന്യൂസിലന്‍ഡിനെതിരായ് ടെസ്റ്റ് പരമ്പര കളിക്കുന്നത്.