രണ്ടാം ട്വന്റി 20 മത്സരത്തിലെ അഞ്ച് വിക്കറ്റ് തോല്‍വിക്ക് ദക്ഷിണാഫ്രിക്കയോട് പകരംവീട്ടി ഇന്ത്യ. മൂന്നാം ട്വന്റി 20 യില്‍ 106 റണ്‍സിന് ഇന്ത്യ ആതിഥേയരെ തോല്‍പ്പിച്ചു. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തില്‍ 201 റണ്‍സ് നേടിയപ്പോള്‍ മറുപടി ബാറ്റിങ്ങില്‍ ദക്ഷിണാഫ്രിക്ക 13.5 ഓഴറില്‍ 95 ന് ഓള്‍ഔട്ടായി. കളിയിലെ താരവും പരമ്പരയിലെ താരവും സൂര്യകുമാര്‍ യാദവ് ആണ്. മൂന്ന് മത്സരങ്ങളുടെ ട്വന്റി 20 പരമ്പര 1-1 എന്ന നിലയില്‍ അവസാനിച്ചു. ആദ്യ മത്സരം മഴമൂലം ഉപേക്ഷിച്ചിരുന്നു.
മൂന്നാം ട്വന്റി 20 യില്‍ 56 പന്തുകളില്‍ നിന്ന് ഏഴ് ഫോറും എട്ട് സിക്‌സും സഹിതം 100 റണ്‍സാണ് സൂര്യകുമാര്‍ അടിച്ചുകൂട്ടിയത്. യഷസ്വി ജയ്‌സ്വാള്‍ 41 പന്തില്‍ 60 റണ്‍സ് നേടി. 2.5 ഓവറില്‍ 17 റണ്‍സ് വഴങ്ങി അഞ്ച് വിക്കറ്റ് വീഴ്ത്തിയ കുല്‍ദീപ് യാദവാണ് ബൗളിങ്ങില്‍ ഇന്ത്യക്കായി മികച്ച പ്രകടനം നടത്തിയത്. രവീന്ദ്ര ജഡേജ മൂന്ന് ഓവറില്‍ 25 റണ്‍സ് വഴങ്ങി രണ്ട് വിക്കറ്റ് വീഴ്ത്തി.
