2024ൽ ചെറിയ താരനിരയുമായെത്തി സര്‍പ്രൈസ് ഹിറ്റായ സിനിമയാണ് പ്രേമലു. മലയാളത്തിന്റെ അതിര്‍ത്തിയും കടന്ന് തെലുങ്കില്‍ വലിയ അഭിപ്രായമാണ് സിനിമയ്ക്ക് ലഭിക്കുന്നത്. ഇപ്പോഴിതാ പ്രേമലു കണ്ടതിന് ശേഷം സിനിമയെ പുകഴ്ത്തി രംഗത്ത് വന്നിരിക്കുകയാണ് പ്രമുഖ സംവിധായകനായ രാജമൗലി. രാജമൗലിയുടെ മകനായ കാര്‍ത്തികേയ ആയിരുന്നു സിനിമയുടെ തെലുഗു വിതരണാവകാശം ഏറ്റെടുത്തിരുന്നത്.
കാര്‍ത്തികേയ തെലുങ്കില്‍ പ്രേമലു കൊണ്ടുവന്നതില്‍ ഞാന്‍ വളരെയേറെ സന്തോഷവാനാണ്. സിനിമയുടെ ആദ്യം മുതല്‍ അവസാനം വരെ ഒരു ചിരിയുടെ കലാപം തന്നെയായിരുന്നു. ചെറുപ്പക്കാരുടെ പ്രണയം മികച്ച രീതിയില്‍ തന്നെ അവതരിപ്പിക്കാന്‍ സിനിമയ്ക്കായിട്ടുണ്ട്. ട്രെയിലര്‍ കണ്ടപ്പോള്‍ തന്നെ റീനുവിനെ എനിക്ക് ഇഷ്ടപ്പെട്ടിരുന്നു. സച്ചിന്‍ എനിക്ക് പ്രിയങ്കരനാണെങ്കിലും എന്റെ ഫേവറേറ്റ് ആദിയാണ്. ജെ കെ ജസ്റ്റ് കിഡ്ഡിംഗ് എന്നാണ് രാജമൗലി കുറിച്ചത്.