ഇസൂസു മോട്ടോഴ്സിന്റെ അഡ്വഞ്ചർ യൂട്ടിലിറ്റി വാഹനം ‘ഡി മാക്സ് വി ക്രോസ്’ബുക്കിങ്ങ് ആരംഭിച്ചു. വരുന്ന ജൂലൈ ആദ്യ ആഴ്ച്കയോടെ വാഹനം ഉടമകൾക്കു കൈമാറുമെന്ന് ഇസൂസു അറിയിച്ചു. കഴിഞ്ഞ ഓട്ടോ എക്സ്പോയിലായിരുന്നു ‘ഡി മാക്സ് വി ക്രോസ്’ പ്രദർശിപ്പിച്ചത്. ആന്ധ്ര പ്രദേശിലെ ശ്രീസിറ്റിയിലെ അത്യാധുനിക ഫാക്ടറിയിലാണ് കമ്പനി ഇന്ത്യയിൽ വിൽപ്പനയ്ക്കായുള്ള ‘ഡി മാക്സ് വി ക്രോസ്’ നിർമിച്ചത്.
‘ഷിഫ്റ്റ് ഓൺ ഫ്ളൈ’ വ്യവസ്ഥയിൽ ഫോർ വീൽ ഡ്രൈവ് സംവിധാനമാണ് വാഹനത്തിന്റെ പ്രധാന പ്രത്യേകത. കൂടിയ വേഗത്തിലും വളവും തിരിവും നിറഞ്ഞ വഴിയിലുമൊക്കെ മെച്ചപ്പെട്ട സ്ഥിരത ഉറപ്പാക്കാൻ ഐ ഗ്രിപ് സാങ്കേതിക വിദ്യയുടെ പിൻബലമുള്ള ഷാസി ഫ്രെയിമാണ് ‘ഡി മാക്സ് വി ക്രോസി’ന് നല്‍കിയിട്ടുള്ളത്. ആധുനിക സൗകര്യങ്ങളിലും സംവിധാനങ്ങളിലുമൊന്നും വിട്ടുവീഴ്ച ചെയ്യാതെയാണ് ഇസൂസു പുതിയ മോഡൽ അവതരിപ്പിക്കുന്നത്. ശരീരപ്രകൃതിക്ക് അനുയോജ്യമായ വിധത്തിൽ രൂപകൽപ്പന ചെയ്ത സീറ്റ്, സ്റ്റീയറിങ്ങിൽ ഘടിപ്പിച്ച ഓഡിയോ കൺട്രോൾ, മൾട്ടി ഇൻഫർമേഷൻ ഡിസ്പ്ലേ സഹിതം ഇലക്ട്രോ ലൂമിനസന്റെ മീറ്റർ എന്നീ നൂതന സവിശേഷതകളും ‘ഡി മാക്സ് വി ക്രോസി’ലുണ്ട്.
കരുത്തേറിയ എൻജിനൊപ്പം അഞ്ചു സ്പീഡ് മാനുവൽ ട്രാൻസ്മിഷനോടെയാണ് ‘ഡി മാക്സ് വി ക്രോസി’ന്റെ വരവ്.
ഇതോടൊപ്പം റഗുലർ കാബ് പിക് അപ്പായ ‘ഡി മാക്സി’ന്റെ പുതുതലമുറ മോഡലിന്റെ ബുക്കിങ്ങിനും ഇസൂസു മോട്ടോഴ്സ് ആരംഭിച്ചു. ചരക്കു നീക്കത്തിനായി രൂപകൽപ്പന ചെയ്ത ഈ ‘ഡി മാക്സ്’ വാണിജ്യ വാഹനമായും റജിസ്റ്റർ ചെയ്യാമെന്നതാണു പ്രധാനനേട്ടമായി കമ്പനി പറയുന്നത്. 12.49 ലക്ഷം രൂപയാണു ‘ഡി മാക്സ് വി ക്രോസി’നു ചെന്നൈയിലെ ഷോറൂം വില.