ഫു‌ട്‌ബോൾ ലോകത്ത് എക്കാലവും ചൂടേറിയ ചർച്ചാവിഷയമാണ് ടീമുകൾക്കുള്ളിലും മൈതാനത്തും കറുത്ത വർഗ്ഗക്കാർ നേരിടുന്ന വർണവിവേചനം. സാധാരണ താരങ്ങൾ തൊട്ട് ഇതിഹാസതാരങ്ങൾ വരെ തങ്ങളുടെ തൊലിപ്പുറത്തിന്റെ പേരിൽ വിവേചനം നേരിട്ടിട്ടുണ്ട്. ലോകമെങ്ങും വർണവിവേചനത്തിനെതിരെയും റേസിസത്തിനെതിരെയും പോരാടുമ്പോൾ ഏഷ്യൻ വംശ‌ജരെ നിറത്തിന്റെയും സംസ്‌കാരത്തിന്റെയും പേരിൽ പരിഹസിച്ചിരിക്കുകയാണ് ഫ്രഞ്ച് സൂപ്പർ താരങ്ങളായ ഒസ്‌മാൻ ഡെംബലെയും ആന്റോയിൻ ഗ്രീസ്‌മാനും.
തങ്ങൾ താ‌മസിക്കുന്ന ഹോട്ടൽ മുറിയിലെത്തിയ ഏഷ്യൻ വംശജരായ തൊഴിലാളികളെ അഷിക്ഷേപിച്ചുകൊണ്ടുള്ള വീഡിയോ ആണ് ഇപ്പോൾ പുറത്ത് വന്നിരിക്കുന്നത്. വീഡിയോ വൈറലായതോടെ താരങ്ങൾ വെട്ടിലായിരിക്കുകയാണ്. ഗ്രീസ്‌മാനെ മാത്രമാണ് വീഡിയോയിൽ കാണാനാവുന്നത്. എന്നാൽ ഡെംബലെയുടെ ശബ്‌ദം വീഡിയോയിൽ വ്യക്തമാണ്. ഇരുവരും തങ്ങളുടെ റൂമിലെത്തിയ ഏഷ്യം വംശജരായ തൊഴിലാളികളെ പരിഹസിക്കുന്നതാണ് വീഡിയോയിലുള്ളത്.
