നായയുടെ ആക്രമണത്തില്‍ നിന്ന് രക്ഷപ്പെടാന്‍ ഫ്‌ളാറ്റിന്റെ മൂന്നാം നിലയില്‍ നിന്ന് ചാടിയ സ്വിഗ്ഗി ജീവനക്കാരന് ദാരുണാന്ത്യം. ഹൈദരബാദില്‍ നിന്നുള്ള മുഹമ്മദ് റിസ്വാന്‍ ആണ് മരിച്ചത്. 23 വയസ്സായിരുന്നു. ഓണ്‍ലൈനായി ഭക്ഷണം ഓര്‍ഡര്‍ ചെയ്ത കസ്റ്റമര്‍ക്ക് ഫ്‌ളാറ്റിലെത്തി ഭക്ഷണം ഡെലിവറി ചെയ്യുന്നതിനിടെയാണ് സംഭവം. കസ്റ്റമറുടെ ജര്‍മന്‍ ഷെപ്പേഡ് ബ്രീഡില്‍ ഉള്‍പ്പെട്ട നായ മുഹമ്മദ് റിസ്വാന്റെ പിന്നാലെ ഓടി. നായയുടെ ആക്രമണത്തില്‍ നിന്ന് രക്ഷപ്പെടാന്‍ റിസ്വാന്‍ മൂന്നാം നിലയില്‍ നിന്ന് താഴേക്ക് ചാടുകയായിരുന്നു.
