Pak vs Ban: ബംഗ്ലാദേശിനെതിരെ മുട്ടിനിൽക്കാൻ പോലും കെൽപ്പില്ല, നാണം കെട്ട് പാകിസ്ഥാൻ, ചരിത്രത്തിൽ ഇങ്ങനൊരു തോൽവി ഇതാദ്യം
ടോസ് നഷ്ടപ്പെട്ട് ബാറ്റിങ്ങിനിറങ്ങിയ പാകിസ്ഥാന് തുടക്കത്തില്‍ തന്നെ തങ്ങളുടെ മുന്‍നിര ബാറ്റര്‍മാരെ നഷ്ടപ്പെട്ടു. സൈം അയൂബ് 6 റണ്‍സും മൊഹമ്മദ് ഹാരിസ് 4 റണ്‍സും നായകനായ സല്‍മാന്‍ അലി ആഘ 3 റണ്‍സും നേടിയാണ് പവലിയനിലേക്ക് മടങ്ങിയത്.ആദ്യത്തെ 6 ബാറ്റര്‍മാരില്‍ 34 പന്തില്‍ 44 റണ്‍സെടുത്ത ഫഖര്‍ സമാനൊഴികെ മറ്റാര്‍ക്കും തന്നെ രണ്ടക്കം കടക്കാനായില്ല. 70 റണ്‍സിന് 6 വിക്കറ്റ് നഷ്ടമായ അവസ്ഥയില്‍ നിന്നും പാകിസ്ഥാനെ കരകയറ്റിയത് വാലറ്റത്ത് ഖുഷ്ദില്‍ ഷാ(17)യും അബ്ബാസ് അഫ്രീദിയും(22) നടത്തിയ പോരാട്ടമായിരുന്നു.
മറുപടി ബാറ്റിങ്ങിനിറങ്ങിയ ബംഗ്ലാദേശിനായി ഹൊസ്സൈന്‍ ഇമോണ്‍ 39 പന്തില്‍ 56 റണ്‍സുമായി തിളങ്ങി. 36 റണ്‍സുമായി തൗഹീദ് ഹ്രിദോയ് പിന്തുണ നല്‍കിയതോടെ 15.3 ഓവറില്‍ 3 വിക്കറ്റ് നഷ്ടത്തില്‍ ബംഗ്ലാദേശ് വിജയം കണ്ടു. ബംഗ്ലാദേശിനായി ടസ്‌കിന്‍ അഹമ്മദ് 3.3 ഓവറില്‍ 22 റണ്‍സ് വഴങ്ങി 3 വിക്കറ്റും മുസ്താഫിസുര്‍ റഹ്‌മാന്‍ നാലോവറില്‍ 6 റണ്‍സ് വഴങ്ങി 2 വിക്കറ്റും നേടി.
