നരോദ ഗാം കൂട്ടക്കൊലക്കേസില്‍ പ്രതിയായ മുന്‍മന്ത്രി മായാ കോഡ്‌നാനിക്ക് അനുകൂലമായി ബിജെപി അധ്യക്ഷന്‍ അമിത് ഷാ നല്‍കിയ മൊഴി വിശ്വസനീയമല്ലെന്ന് പ്രത്യേകാന്വേഷണസംഘം കോടതിയിൽ വ്യക്തമാക്കി. സംഭവ ദിവസം ഗുജറാത്ത് എംഎല്‍എ ആയായിരുന്ന മായ കോഡ്‌നാനി തനിക്കൊപ്പം നിയമസഭയിലും പിന്നീട് സിവില്‍ ആശുപത്രിയിലും ഉണ്ടായിരുന്നു എന്നായിരുന്നു അമിത് ഷാ കോടതിയില്‍ മൊഴി നല്‍കിയത്.
മായ കോഡ്‌നാനി ആശുപത്രിയിലുണ്ടായിരുന്നതായി കേസിലെ മറ്റു പ്രതികളൊന്നും പറഞ്ഞിട്ടില്ലെന്നും വാദത്തിനിടെ പ്രോസിക്യൂട്ടര്‍ ഗൗരങ് വ്യാസ് കോടതിയെ അറിയിക്കുകയായിരുന്നു. ഇക്കാര്യം വീണ്ടും പരിഗണിക്കാമെന്ന് കോടതി പ്രോസിക്യൂട്ടര്‍ക്ക് ഉറപ്പ് നല്‍കുകയും ചെയ്തിരുന്നു.
സുപ്രീം കോടതി നിയോഗിച്ച പ്രത്യേക സംഘം അന്വേഷിക്കുന്ന ഗുജറാത്ത് കലാപത്തിലെ പ്രധാനപ്പെട്ട ഒന്‍പതു കേസുകളിലൊന്നാണ് നരോദ ഗാം കൂട്ടക്കൊല. 11 മുസ്ലിംകളാണ് കലാപത്തില്‍ കൊല്ലപ്പെട്ടത്.