സദ്ഗുരു സ്വന്തം മകളെ വിവാഹം ചെയ്തയച്ചിട്ട് മറ്റു സ്ത്രീകളെ സന്യാസത്തിന് പ്രോത്സാഹിപ്പിക്കുന്നതെന്തിനെന്ന് കോടതി

സദ്ഗുരു സ്വന്തം മകളെ വിവാഹം ചെയ്തയച്ചിട്ട് മറ്റു സ്ത്രീകളെ സന്യാസത്തിന് പ്രോത്സാഹിപ്പിക്കുന്നതെന്തിനെന്ന് കോടതി. മദ്രാസ് ഹൈക്കോടതിയാണ് ഇക്കാര്യം ചോദിച്ചത്. റിട്ടയര്‍ പ്രഫസര്‍ എസ് കാമരാജ് തന്റെ ഉന്നത വിദ്യാഭ്യാസമുള്ള രണ്ട് പെണ്‍കുട്ടികളെ ബ്രെയിന്‍ വാഷ് ചെയ്ത് ഇഷാ സെന്ററില്‍ താമസിപ്പിച്ചിരിക്കുകയാണെന്ന് ആരോപിച്ച് നല്‍കിയ പരാതിയിലാണ് കോടതിയുടെ ഇടപെടല്‍.

39ഉം 42ഉം വയസുള്ള പെണ്‍മക്കളാണ് ഇദ്ദേഹത്തിനുള്ളത്. ഇവര്‍ കഴിഞ്ഞദിവസം കോടതിയില്‍ ഹാജരായി. തങ്ങളുടെ ഇഷ്ടപ്രകാരമാണ് ഫൗണ്ടേഷനില്‍ തുടരുന്നതെന്ന് അവര്‍ കോടതിയെ അറിയിച്ചു. തങ്ങള്‍ സന്യാസിമാരല്ലെന്നും സന്യസിക്കാത്തവരും വ്രതം എടുക്കുന്നവരുമായ ആളുകളും ഇഷയില്‍ ഉണ്ടെന്ന് അവര്‍ പറഞ്ഞു.