മുന്‍ പ്രധാനമന്ത്രിയും മുതിര്‍ന്ന ബി ജെ പി നേതാവുമായ എ ബി വാജ്‌പേയിയുടെ ആരോഗ്യ നില ഗുരുതരമെന്ന് ആശുപത്രി അധികൃതർ അറിയിച്ചു. കഴിഞ്ഞ 24 മണിക്കൂറിനുള്ളില്‍ അദ്ദേഹത്തിന്റെ ആരോഗ്യനില മോശമായതായി ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (എയിംസ്) പത്രക്കുറിപ്പില്‍ അറിയിക്കുകയായിരുന്നു.
ജീവന്‍രക്ഷാ ഉപകരണങ്ങളുടെ സഹായത്തോടെയാണ് അദ്ദേഹം ജീവന്‍ നിലനിര്‍ത്തുന്നതെന്നും എയിംസ് പത്രക്കുറിപ്പില്‍ അറിയിച്ചു. ന്യൂഡല്‍ഹിയിലെ ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ കഴിഞ്ഞ ഒമ്പതാഴ്ചയായി വാജ്‌പേയി ചികിത്സയിലാണ്.
കഴിഞ്ഞ ദിവസം വാജ്പേയിയെ പ്രധാനമന്ത്രി നരേന്ദ്ര മോദി വൈകിട്ട് 7.15ന് ആശുപത്രിയിൽ എത്തി സന്ദർശിച്ചിരുന്നു. മോദിക്ക് ശേഷം കേന്ദ്ര മന്ത്രി സ്മൃതി ഇറാനി, റയിൽവേ മന്ത്രി പിയൂഷ് ഗോയൽ, ബിജെപി എംപി മീനാക്ഷി ലേഖി എന്നിവരും വാജ്പേയിയെ സന്ദർശിച്ചു.