കാര്‍ ലോറിയുമായി കൂട്ടിയിടിച്ച് കത്തി അഞ്ചുപേര്‍ മരിച്ചു. നാമക്കലില്‍ നിന്ന് വരികയായിരുന്ന കാറും കാട്ടുമന്നാര്‍ കോവിലില്‍ നിന്ന് സേലത്തേക്ക് പോകുകയായിരുന്ന ലോറിയും കടലൂര്‍ വിരുദാചലത്ത് കുട്ടിയിടിച്ചാണ് അപകടം.
ബാലഗുരു (45), മായവേല്‍ (44), ധനചെല്ലയ്യന്‍ (25), രാജദുരൈ(43), ഷണ്‍മുഖവേലു(35) എന്നിവരാണ് മരിച്ചത്. കാറിലുണ്ടായിരുന്ന മറ്റൊരു യാത്രക്കാരന്‍ രാജേന്ദ്രന്‍(39) കാറിന്റെ പിറകിലെ ചില്ല് പൊട്ടിച്ച് രക്ഷപ്പെട്ടു. കാര്‍ ലോറിയുടെ ഡീസല്‍ ടാങ്കിലിടിച്ചുള്ള സ്‌ഫോടനത്തിലാണ് കാറില്‍ യാത്ര ചെയ്ത അഞ്ചുപേരും വെന്തുമരിച്ചത്.
കടലൂര്‍ കുറിഞ്ചിപ്പാടി അയനാംപെട്ടി സ്വദേശികളാണ് മരിച്ചവരെല്ലാം. നാമക്കലില്‍ സ്വകാര്യകോളേജില്‍ പഠിക്കുന്ന ബന്ധുവായ പെണ്‍കുട്ടിയെ കണ്ട് തിരിച്ച് വരികെയാണ് അപകടം. ലോറി ഡ്രൈവര്‍ വേല്‍മുരുഗനെ പൊലീസ് അറസ്റ്റ് ചെയ്തു.