റിയാലിറ്റി ഷോയിലെ ഫയര്‍ ഡാന്‍സ് അനുകരിച്ച കുട്ടിക്ക് ദാരുണാന്ത്യം. വായില്‍ മണ്ണെണ്ണയൊഴിച്ച് തീയിലേയ്ക്കു തുപ്പുന്ന കളിയാണ് കുട്ടിയുടെ ജീവനെടുത്തത്. തെലുങ്കാനയിലെ ആറാം ക്ലാസ് വിദ്യാര്‍ത്ഥിയായ രാപല്‍ കാളി വിശ്വനാഥാണ് കൊല്ലപ്പെട്ടത്.
ചൊവ്വാഴ്ചയാണ് ഒരു ടെലിവിഷന്‍ റിയാലിറ്റി ഷോയില്‍ ബാലന്‍ ഈ ഫയര്‍ ഡാന്‍സ് കണ്ടത്. വായില്‍ മണ്ണെണ്ണ ഒഴിച്ച് തീയിലേക്ക് തുപ്പുന്ന തീക്കളിയാണ് അന്നു തന്നെ കുട്ടി അനുകരിച്ചത്. എന്നാല്‍, കുട്ടിയുടെ കളിക്കിടെ തീ നിയന്ത്രണാതീതമായി ആളിക്കത്തുകയായിരുന്നു. തുടര്‍ന്ന് കുട്ടിക്ക് ഗുരുതരമായി പൊള്ളലേല്‍ക്കുകയും ചെയ്തു.
ഉടന്‍ തന്നെ കുട്ടിയെ അടുത്തുള്ള ആശുപത്രിയില്‍ എത്തിച്ചെങ്കിലും നില ഏറെ ഗുരുതരമായതിനാല്‍ വിദഗ്ധ ചികിത്സയ്ക്കായി ഹൈദരാബാദിലെ ആശുപത്രിയിലേക്ക് മാറ്റുകയായിരുന്നു. തുടര്‍ന്ന് വെള്ളിയാഴ്ച കുട്ടി മരണത്തിനു കീഴടങ്ങുകയും ചെയ്തു. പൊലീസ് കേസ് എടുത്ത് അന്വേഷണം ആരംഭിച്ചു.