ബാഗില്‍ എന്താണെന്ന ചോദ്യത്തിന് യാത്രക്കാരന്‍ ബോംബാണെന്ന് മറുപടി നല്‍കിയതുമൂലം നെടുമ്പാശേരി വിമാനത്താവളത്തില്‍ വിമാനം രണ്ടുമണിക്കൂര്‍ വൈകി. സംഭവത്തില്‍ തിരുവനന്തപുരം സ്വദേശി പ്രശാന്തിനെ കസ്റ്റഡിയില്‍ എടുത്തു. ബാഗിലെന്താണെന്ന് സുരക്ഷാ ഉദ്യോഗസ്ഥര്‍ ചോദിച്ചത് ഇഷ്ടപ്പെടാത്തത് കൊണ്ടാണ് ബാഗില്‍ ബോംബാണെന്ന് പറഞ്ഞതെന്നാണ് പ്രശാന്ത് പറയുന്നത്.
ഇന്ന് പുലര്‍ച്ചെയായിരുന്നു സംഭവം. ഇതോടെ പുലര്‍ച്ചെ 2.10 ന് പോകേണ്ടിയിരുന്ന വിമാനം 4.30 നാണ് പുറപ്പെട്ടത്. സുരക്ഷാ ഭീഷണി കണക്കിലെടുത്താണ് ഇയാളുടെ അറസ്റ്റ് രേഖപ്പെടുത്തിയത്. തായ് എയര്‍ലൈന്‍സില്‍ കുടുംബത്തോടൊപ്പം തായ്‌ലാന്റിലേക്ക് പോകാനെത്തിയതായിരുന്നു പ്രശാന്ത്. ഭാര്യയും മകനും ഒപ്പം നാലുപേരായിരുന്നു എത്തിയത്.