സെയ്ത്താനിലെ നായിക നടി അരുന്ധതി നായരുടെ ആരോഗ്യനില ഗുരുതരമായി തുടരുകയാണ്. വ്യാഴാഴ്ച രാത്രി കോവളം ബൈപ്പാസില്‍ വച്ചാണ് അരുന്ധതി സഞ്ചരിച്ച സ്‌കൂട്ടര്‍ അപകടത്തില്‍പ്പെട്ടത്. തലയ്ക്ക് സാരമായി പരിക്കേറ്റ അരുന്ധതിയെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ആരോഗ്യനില ഗുരുതരമായി തുടര്‍ന്നതിനാല്‍ വെന്റിലേറ്ററിലേക്ക് മാറ്റി. ഇപ്പോള്‍ അരുന്ധതിയുടെ സഹോദരി ആരതി നായര്‍ സഹായം അഭ്യര്‍ത്ഥിച്ച് ഇന്‍സ്റ്റഗ്രാമില്‍ സ്റ്റോറി പങ്കുവെച്ചിരിക്കുകയാണ്. വെന്റിലേറ്ററില്‍ ജീവനുവേണ്ടി പോരാടുകയാണെന്നും ദിനംപ്രതിയുള്ള ആശുപത്രി ചിലവുകള്‍ താങ്ങാവുന്നതിലും അധികമാണെന്നും തങ്ങളെ സഹായിക്കണമെന്നുമാണ് ആവശ്യപ്പെട്ടിരിക്കുന്നത്. അപകടത്തില്‍ അരുന്ധതിയുടെ വാരിയെല്ലുകള്‍ തകര്‍ന്നിട്ടുണ്ട്.
തലച്ചോറില്‍ രക്തം കട്ടപിടിച്ചു. പ്ലീഹയ്ക്ക് കേടു സംഭവിച്ചിട്ടുണ്ട്. അതേസമയം അരുന്ധതിയുടെ ആരോഗ്യ വിവരം അന്വേഷിക്കുന്നവരോട് നന്ദിയുണ്ടെന്നും എന്നാല്‍ ഇപ്പോള്‍ കൂടുതല്‍ പറയാനുള്ള സാഹചര്യമില്ലെന്നും സുഹൃത്ത് രമ്യാ ജോസഫ് പറഞ്ഞു.