യുവനടി ആക്രമിക്കപ്പെട്ട സംഭവം അറിഞ്ഞപ്പോള്‍ തനിക്ക് വലിയ വിഷമം തോന്നിയെന്നും ഇത്തരമൊരു സംഭവമുണ്ടാവുമെന്ന് വിശ്വസിക്കാനേ കഴിയുന്നില്ലെന്നും മലയാളത്തിന്റെ പ്രിയ നായിക ശോഭന. അടുത്തിടെ ഒരു തമിഴ് മാധ്യമത്തിന് നല്‍കിയ അഭിമുഖത്തിലാണ് ശോഭന ഇത് വ്യക്തമാക്കിയത്.
അഭിനയ ലോകത്ത് നിന്നൊക്കെ വിട്ട്, നൃത്തത്തില്‍ പുതിയ ഗവേഷണങ്ങള്‍ നടത്തുകയാണ് ശോഭന. വിവാദങ്ങളിലൊന്നും തലയിടാന്‍ പണ്ടേ തനിക്ക് താത്പര്യമില്ലെന്നും ശോഭന പറയുകയുണ്ടായി. ദിലീപുമായുള്ള അടുപ്പത്തെ കുറിച്ചും ശോഭന അഭിമുഖത്തില്‍ സംസാരിച്ചിരുന്നു.
ദിലീപിനെ പരിചയപ്പെടുന്നത് 1997 ലാണ്. മമ്മൂട്ടിയും ഞാനും നായികാ നായകന്മാരായി അഭിനയിച്ച കളിയൂഞ്ഞാലില്‍ ദിലീപും പ്രധാന കഥാപാത്രത്തെ അവതരിപ്പിച്ചിരുന്നു. അന്ന് ദിലീപ് വളരെ സൗമ്യനായിരുന്നു. ഷൂട്ടിങ് ഇടവേളകളിലെ മുഖ്യതാരം ദിലീപായിരുന്നു. മിമിക്രി കാണിച്ചും ചിരിപ്പിച്ചും സെറ്റില്‍ എല്ലാവരെയും കൈയ്യിലെടുക്കും.ഇപ്പോള്‍ വര്‍ഷങ്ങളായി തനിക്ക് ദിലീപുമായി സൗഹൃദ ബന്ധങ്ങളൊന്നും ഇല്ല എന്ന് ശോഭന പറയുന്നു.
ഓരോരുത്തരും അവരവരുടെ മേഖലയില്‍ തിരക്കിലായപ്പോള്‍ സിനിമയിലെ സൗഹൃദങ്ങള്‍ പോലും ഇല്ലാതെയായി. സിനിമയിലെ പുതിയ രീതികളെ കുറിച്ച് എനിക്കിപ്പോള്‍ അറിവില്ല. സിനിമയില്‍ പുരുഷന്മാര്‍ കാര്യങ്ങള്‍ തീരുമാനിക്കുന്ന സമ്പ്രദായം മലയാളത്തില്‍ മാത്രമല്ല, ലോക സിനിമയിലും ഇങ്ങനെയൊക്കെ തന്നെയാണെന്നും ശോഭന വ്യക്തമാക്കി.