ചലച്ചിത്ര സംവിധായകന്‍ അലി അക്ബറിന്‍റെ കാര്‍ എറിഞ്ഞു തകര്‍ത്തു. കോഴിക്കോട് ചേവരമ്പലത്തുള്ള വീടിനു മുന്നില്‍ നിര്‍ത്തിയിട്ടിരുന്ന കാറാണ് എറിഞ്ഞു തകര്‍ത്തത്. ഇന്നു പുലര്‍ച്ചെയാണ് സംഭവം ഉണ്ടായത്.
ചലച്ചിത്ര മേഖലയില്‍ നിരവധി എതിര്‍പ്പുകള്‍ നേരിടുന്ന തിലകന്‍ നായകനായ ‘അച്ഛന്‍’ എന്ന സിനിമയുടെ ചിത്രീകരണം തുടങ്ങാനിരിക്കേയാണ്‌ ആക്രമണം. തിലകനെ നായകനാക്കി സിനിമയെടുക്കുന്നതിന് തുടക്കം മുതല്‍ തന്നെ അലി അക്ബറിന് പരക്കെ എതിര്‍പ്പ് നേരിടേണ്ടി വന്നിരുന്നു.
അലി അക്ബര്‍ തിലകനെ നായകനാക്കി സിനിമയെടുക്കുന്നതിനെതിരെ ചലച്ചിത്ര മേഖലയിലെ സംഘടനകളും കേരള കോണ്‍ഗ്രസ് ബി വിഭാഗവും എതിര്‍പ്പുമായി രംഗത്ത് എത്തിയിരുന്നു. കേരള കോണ്‍ഗ്രസ് ബി വിഭാഗമാണ് അക്രമത്തിന് പിന്നിലെന്ന് അലി അക്ബര്‍ ആരോപിച്ചു. അതേസമയം, ആരോപണം കേരള കോണ്‍ഗ്രസ് ബി നേതാവ് ആര്‍ ബാലകൃഷ്ണ പിള്ള നിഷേധിച്ചു. അക്രമികള്‍ക്കെതിരെ ഉചിതമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.