ഇന്നലെ പഞ്ചാബ് കിങ്‌സിനെതിരെ നടന്ന മത്സരത്തിലും ലിവിങ്സ്റ്റണ് നിരാശപ്പെടുത്തി. 21-2 എന്ന നിലയില്‍ ആര്‍സിബി പ്രതിരോധത്തിലായപ്പോള്‍ ക്രീസിലെത്തിയ ലിവിങ്സ്റ്റണ് ആറ് പന്തുകളില്‍ വെറും നാല് റണ്‍സെടുത്ത് പുറത്തായി. ബാറ്റിങ് തകര്‍ച്ചയുണ്ടായാല്‍ കാമിയോ കളിക്കാന്‍ സാധിക്കുന്ന താരമെന്ന നിലയിലാണ് ആര്‍സിബി ലിവിങ്സ്റ്റണിനെ ലേലത്തില്‍ വിളിച്ചെടുത്തത്. എന്നാല്‍ ആര്‍സിബിയുടെ ബാറ്റിങ് തകര്‍ച്ചയില്‍ ഭാഗമാകുക മാത്രമാണ് ഇതുവരെ ലിവിങ്സ്റ്റണ് ചെയ്തത്.
ഈ സീസണില്‍ ആര്‍സിബിക്കായി ഏഴ് മത്സരങ്ങളില്‍ നിന്ന് ലിവിങ്സ്റ്റണ് നേടിയത് വെറും 87 റണ്‍സ് മാത്രം. 17.40 ആണ് ശരാശരി. കഴിഞ്ഞ സീസണില്‍ പഞ്ചാബിനായി കളിച്ച ലിവിങ്സ്റ്റണ് ഏഴ് മത്സരങ്ങളില്‍ നിന്ന് നേടിയത് 111 റണ്‍സാണ്. 2022 സീസണില്‍ മാത്രമാണ് ലിവിങ്സ്റ്റണ് 300 റണ്‍സില്‍ കൂടുതല്‍ സ്‌കോര്‍ ചെയ്തിരിക്കുന്നത്. അന്ന് 14 കളികളില്‍ നിന്ന് 437 റണ്‍സ് നേടാന്‍ സാധിച്ചിരുന്നു.
