പാകിസ്ഥാനില്‍ പോളിയോ നല്‍കാനെത്തിയ അധ്യാപകരെ തട്ടിക്കൊണ്ട് പോയി

PRO

പാകിസ്ഥാനില്‍ പോളിയോ നിര്‍മാര്‍ജന പ്രവര്‍ത്തനത്തിലേര്‍പ്പെട്ട 11 അധ്യാപകരെ ഭീകരര്‍ തട്ടിക്കൊണ്ടുപോയി. ഖൈബര്‍ ഗോത്രമേഖലയിലെ ബാരായില്‍ ഹിറ പബ്ലിക് സ്കൂളില്‍ വിദ്യാര്‍ഥികള്‍ക്ക് പോളിയോ വാക്സിന്‍ വിതരണംചെയ്യുന്നതിനിടെയാണ് തട്ടിക്കൊണ്ടു പോകല്‍ നടന്നത്.

താലിബാന്‍ ബന്ധമുള്ള ലഷ്കറെ ഇസ്ലാം സംഘത്തിന് സ്വാധീനമുള്ള മേഖലയിലേക്കാണ് അധ്യാപകരെ കടത്തിക്കൊണ്ടുപോയതെന്ന് അധികൃതര്‍ പറഞ്ഞു. ആരോഗ്യപ്രവര്‍ത്തകര്‍ വാക്സിന്‍ എത്തിച്ച് മടങ്ങിയ ഉടന്‍ തോക്കുധാരികള്‍ സ്കൂളില്‍ കടന്നുകയറുകയായിരുന്നു.

പാകിസ്ഥാനിലെ പോളിയോ വാക്സിനേഷന്‍ പ്രവര്‍ത്തനം അനുവദിക്കില്ലെന്ന് ഭീകരര്‍ പ്രഖ്യാപിച്ചിട്ടുണ്ട്. മുസ്ലിങ്ങളെ വന്ധ്യംകരിക്കാനുള്ള പാശ്ചാത്യ പരിപാടിയാണിതെന്നാണ് ഭീകരരുടെ ആരോപണം.

സുരക്ഷാഉദ്യോഗസ്ഥര്‍ക്ക് ഈ മേഖലയിലേക്ക് എത്താന്‍ കഴിയില്ലെന്നാണ് റിപ്പോര്‍ട്ട്. പ്രാദേശികനേതാക്കളുമായുള്ള ചര്‍ച്ചയ്ക്കൊടുവില്‍ അധ്യാപകരെ ഭീകരര്‍ വിട്ടയക്കുമെന്നാണ് പ്രതീക്ഷിക്കുന്നത്.