22-ാം മിനിറ്റില്‍ നിക്കോ വില്യംസിലൂടെ സ്‌പെയിന്‍ ആണ് ഗോള്‍വേട്ടയ്ക്കു തുടക്കമിട്ടത്. തൊട്ടുപിന്നാലെ മൈക്കിള്‍ മെറീനോയുടെ ഗോളിലൂടെ സ്‌പെയിന്റെ ലീഡ് ഇരട്ടിയായി. ആദ്യ പകുതി കവിയുമ്പോള്‍ സ്‌പെയിന്‍ 2-0 ത്തിനു ലീഡ് ചെയ്യുകയായിരുന്നു. രണ്ടാം പകുതിയിലും സ്‌പെയിന്‍ തന്നെ ആദ്യം സ്‌കോര്‍ ചെയ്തു. 54-ാം മിനിറ്റില്‍ സ്‌പെയിനിനു അനുകൂലമായി ലഭിച്ച പെനാല്‍റ്റി ലാമിന്‍ യമാല്‍ ലക്ഷ്യത്തിലെത്തിച്ചു. തൊട്ടടുത്ത മിനിറ്റില്‍ പെഡ്രിയിലൂടെ നാലാം ഗോളും സ്‌പെയിന്‍ കണ്ടെത്തി.
വന്‍ മാര്‍ജിനില്‍ ജയം ഉറപ്പിച്ച സ്‌പെയിന്‍ പിന്നീട് പ്രതിരോധത്തിലേക്ക് നീങ്ങിയതോടെ ഫ്രാന്‍സ് ആക്രമിച്ചു കളിക്കാന്‍ തുടങ്ങി. 59-ാം മിനിറ്റില്‍ കിലിയന്‍ എംബാപ്പെയുടെ പെനാല്‍റ്റി ഗോളിലൂടെ ഫ്രാന്‍സിന്റെ ആദ്യ മറുപടിയെത്തി. 67-ാം മിനിറ്റില്‍ ലാമിന്‍ യമാല്‍ തന്റെ രണ്ടാം ഗോള്‍ സ്വന്തമാക്കി സ്‌പെയിനിനെ 5-1 നു മുന്നിലെത്തിച്ചു.
അവസാന 30 മിനിറ്റില്‍ ഫ്രാന്‍സ് നിറഞ്ഞാടുന്ന കാഴ്ചയാണ് പിന്നീട് കണ്ടത്. 79-ാം മിനിറ്റില്‍ റയാന്‍ ചെര്‍ക്കി, 84-ാം മിനിറ്റില്‍ ഡാനി വിവിയനിലൂടെ സെല്‍ഫ് ഗോള്‍, മത്സരത്തിനു ഫൈനല്‍ വിസില്‍ മുഴങ്ങുന്നതിനു തൊട്ടുമുന്‍പ് കോലോ മുവാനി എന്നിവരിലൂടെ ഫ്രാന്‍സ് സ്‌കോര്‍ ചെയ്‌തെങ്കിലും ഒരു ഗോളിനു പിന്നിലായി.
