മോഹന്‍ലാല്‍ മലയാളത്തിന്‍റെ മാത്രം സ്വത്തല്ല. അദ്ദേഹം ഇന്ത്യന്‍ സിനിമയുടെ പൊതുവായ മുഖമാണ്. തമിഴിലും തെലുങ്കിലും കന്നഡയിലും ഹിന്ദിയിലും വന്‍ ഹിറ്റുകള്‍ സൃഷ്ടിച്ചിട്ടുള്ള താരമാണ്.
മോഹന്ലാലിന്റെ തെലുങ്ക് മെഗാഹിറ്റ് ‘ജനതാ ഗാരേജ്’ റിലീസ് ചെയ്തിട്ട് തിരുവോണദിനത്തില്‍ ഒരു വര്‍ഷം തികഞ്ഞിരുന്നു. അതിന്‍റെ ഓര്‍മ്മയില്‍ ആ ചിത്രത്തില്‍ മോഹന്ലാലിന്റെ സഹതാരമായിരുന്ന തെലുങ്ക് സൂപ്പര്‍സ്റ്റാര്‍ ജൂനിയര്‍ എന്‍‌ടി‌ആര്‍ മോഹന്‍ലാലിന് നന്ദി അറിയിച്ചുകൊണ്ട് ട്വീറ്റ് ചെയ്തു.
കഴിഞ്ഞ വര്‍ഷം തെലുങ്ക് സിനിമയിലെ ഏറ്റവും വലിയ ഹിറ്റുകളില്‍ ഒന്നായിരുന്നു ജനതാ ഗാരേജ്. സത്യ എന്ന പവര്‍ഫുള്‍ കഥാപാത്രമായി മോഹന്‍ലാല്‍ മിന്നിത്തിളങ്ങി. തെലുങ്ക് പ്രേക്ഷകര്‍ക്ക് അപരിചിതവും തെലുങ്ക് താരങ്ങള്‍ക്ക് അപ്രാപ്യവുമായ ആ അഭിനയശൈലിയില്‍ ഏവരും മയങ്ങുകയും ചെയ്തു.
അനായാസമാണ് ജനതാഗാരേജ് 100 കോടി ക്ലബില്‍ ഇടം നേടിയത്. ജൂനിയര്‍ എന്‍ ടി ആറിന്‍റെ കരിയറിലെയും ഏറ്റവും വലിയ ഹിറ്റായി ജനതാ ഗാരേജ്. ഈ സിനിമയുടെ വന്‍ വിജയത്തോടെ മോഹന്‍ലാലിന് തെലുങ്ക് നാട്ടില്‍ വലിയ ആരാധകവൃന്ദമുണ്ടായി.
പുലിമുരുകന്‍റെ തെലുങ്ക് പതിപ്പ് മന്യം പുലിയും വന്‍ ഹിറ്റായതോടെ ചിരഞ്ജീവി, ബാലകൃഷ്ണ, നാഗാര്‍ജ്ജുന, വെങ്കിടേഷ് തുടങ്ങിയ താരങ്ങളുടെ നിരയിലേക്ക് തെലുങ്കില്‍ മോഹന്ലാലിന്റെ ജനപ്രീതിയും ഉയര്‍ന്നു.