2024ലെ സര്‍പ്രൈസ് ഹിറ്റാണ്പ്രശാന്ത് വര്‍മ സംവിധാനംചെയ്ത ഹനുമാന്‍. പൊങ്കലിന് റിലീസ് ചെയ്ത സിനിമയില്‍ തേജ സജ്ജയാണ് നായകനായി അഭിനയിച്ചത്.പ്രശാന്ത് വര്‍മ സംവിധാനംചെയ്ത ചിത്രം ഇതിനോടകം തന്നെ 150 കോടിയില്‍ കൂടുതല്‍ കളക്ഷന്‍ നേടിക്കഴിഞ്ഞു. നിരവധി സാഹസിക രംഗങ്ങള്‍ സിനിമയിലുണ്ട്, സിനിമയില്‍ അഭിനയിക്കുന്നതിനിടെ കണ്ണിന് പരിക്കേറ്റിരുന്നുവെന്ന് പറഞ്ഞിരിക്കുകയാണ് തേജ സജ്ജ.
ചിത്രീകരണത്തിനിടെ തേജയുടെ വലതുകണ്ണിനാണ് പരിക്കേറ്റത്. പരിക്ക് പൂര്‍ണമായി ബേധമാകണമെങ്കില്‍ ശസ്ത്രക്രിയ ചെയ്യണമെന്നും നടന്‍ പറഞ്ഞു.
'ഹനുമാന്റെ ചിത്രീകരണത്തിനിടെ എല്ലുകള്‍ ഒടിഞ്ഞിരുന്നു. പരിക്കുകള്‍ ഇപ്പോഴുമുണ്ട്. ഇടയ്ക്ക് വലതുകണ്ണിന്റെ കോര്‍ണിയയ്ക്ക് പരിക്കേറ്റു. ഈ മുറിവ് ഉണങ്ങുന്നതേയുള്ളൂ. കഥാപാത്രത്തിനായ് കണ്ണില്‍ ഉപയോഗിച്ച ചുവന്ന ലെന്‍സ് കാരണമുണ്ടായതാണ് കോര്‍ണിയയിലെ പരിക്ക്. കൂടാതെ ഒരുപാട് പൊടിയും ചെറിയ കല്ലുമെല്ലാം കണ്ണില്‍ വീണു. വേദനാജനകമായിരുന്നു അത്. കാഴ്ച പൂര്‍ണമായും പഴയപോലെയാവണമെങ്കില്‍ ഉടനേതന്നെ ശസ്ത്രക്രിയ ചെയ്യണം.''-തേജ സജ്ജ പറഞ്ഞു.