മഹേഷ് നാരായണന്‍ ചിത്രത്തിലെ മമ്മൂട്ടിയുടെ ലുക്ക് പുറത്ത്. താടിയില്ലാതെ കട്ടി മീശയില്‍ എക്‌സിക്യുട്ടീവ് ലുക്കിലാണ് മമ്മൂട്ടിയെ ലൊക്കേഷനില്‍ കാണുന്നത്. ശ്രീലങ്കയില്‍ ചിത്രീകരണം നടക്കുന്ന സിനിമയുടെ ലൊക്കേഷന്‍ ചിത്രങ്ങള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്. ഈ ചിത്രത്തില്‍ ഒരു ടെറര്‍ ലുക്കിലാണ് മമ്മൂട്ടിയെ കാണുന്നത്. സംവിധായകന്‍ മഹേഷ് നാരായണനും മമ്മൂട്ടിക്കൊപ്പമുണ്ട്. നിര്‍മാതാവ് ആന്റോ ജോസഫിനേയും ചിത്രത്തില്‍ കാണാം.
ഇന്‍വസ്റ്റിഗേഷന്‍ ആക്ഷന്‍ ത്രില്ലറായ ചിത്രത്തില്‍ മമ്മൂട്ടിയുടേത് നെഗറ്റീവ് കഥാപാത്രമാണോ എന്ന സംശയമാണ് ആരാധകര്‍ക്കുള്ളത്. 'ആ നോട്ടം ഇത്തിരി പെശകാണല്ലോ' എന്നാണ് സോഷ്യല്‍ മീഡിയയില്‍ മമ്മൂട്ടിയുടെ ചിത്രം പങ്കുവെച്ച് ആരാധകര്‍ പറയുന്നത്. ഷാജി പാടൂര്‍ സംവിധാനം ചെയ്ത അബ്രഹാമിന്റെ സന്തതികള്‍ എന്ന ചിത്രത്തിലെ മമ്മൂട്ടിയുടെ ലുക്കുമായി സാമ്യമുള്ളതാണ് മെഗാസ്റ്റാറിന്റെ ഇപ്പോഴത്തെ ലുക്ക്. ഡെറിക് അബ്രഹാം എന്ന പൊലീസ് കഥാപാത്രത്തെയാണ് അബ്രഹാമിന്റെ സന്തതികളില്‍ മമ്മൂട്ടി അവതരിപ്പിച്ചത്.
Mammootty - Mahesh Narayanan Movie
അതേസമയം മഹേഷ് നാരായണന്‍ ചിത്രത്തിലെ മോഹന്‍ലാലിന്റെ ലുക്ക് ഇതുവരെ പുറത്തുവന്നിട്ടില്ല. മമ്മൂട്ടിക്കൊപ്പം മോഹന്‍ലാലും ഷൂട്ടിങ്ങിനു ജോയിന്‍ ചെയ്തിട്ടുണ്ടെങ്കിലും ലൊക്കേഷനില്‍ നിന്നുള്ള മോഹന്‍ലാല്‍ ചിത്രത്തിനായി ആരാധകര്‍ കാത്തിരിക്കുകയാണ്. ആന്റോ ജോസഫ് ഫിലിം കമ്പനിയുടെ ബാനറില്‍ ആന്റോ ജോസഫാണ് ചിത്രം നിര്‍മിക്കുന്നത്. കുഞ്ചാക്കോ ബോബനും മമ്മൂട്ടിക്കും മോഹന്‍ലാലിനും ഒപ്പം ശ്രീലങ്കയില്‍ ഉണ്ട്. ഫഹദ് ഫാസിലും ഈ ചിത്രത്തില്‍ അഭിനയിക്കുന്നുണ്ടെന്നാണ് വിവരം.