താരതമ്യേന ചെറിയ സ്‌കോര്‍ എന്ന് തോന്നിപ്പിച്ചെങ്കിലും തുടക്കം മുതല്‍ ഇന്ത്യക്ക് തിരിച്ചടികളായിരുന്നു. സ്‌കോര്‍ബോര്‍ഡില്‍ 31 റണ്‍സായപ്പോള്‍ ഇന്ത്യയുടെ നാല് വിക്കറ്റുകള്‍ നഷ്ടമായി. എന്നാല്‍ ഒരറ്റത്ത് വിരാട് കോലി ആത്മവിശ്വാസത്തിന്റെ പ്രതിരൂപമായപ്പോള്‍ പാക്കിസ്ഥാന്‍ ബൗളര്‍മാര്‍ ജയം കൈവിട്ടു. വളരെ പതിഞ്ഞ താളത്തില്‍ തുടങ്ങിയ കോലിയുടെ ഇന്നിങ്‌സ് അവസാന അഞ്ച് ഓവറിലേക്ക് എത്തിയപ്പോള്‍ ട്രാക്ക് മാറി. 53 പന്തില്‍ ആറ് ഫോറും നാല് സിക്‌സും സഹിതം 82 റണ്‍സുമായി കോലി പുറത്താകാതെ നിന്നു. ഹാര്‍ദിക് പാണ്ഡ്യ 37 പന്തില്‍ 40 റണ്‍സ് നേടി. മറ്റാര്‍ക്കും കാര്യമായ സംഭവനകള്‍ നല്‍കാന്‍ സാധിച്ചില്ല.
