കോഹ്‌ലിയെ എങ്ങനെ പുറത്താക്കാം; ഓസീസ് ബോളര്‍മാര്‍ക്ക് തന്ത്രങ്ങളുപദേശിച്ച് പോണ്ടിംഗ്
ചൊവ്വ, 4 ഡിസം‌ബര്‍ 2018 (14:30 IST)
ബാറ്റ് കൊണ്ടും വാക്ക് കൊണ്ടും ആക്രമിക്കുന്ന ഇന്ത്യന്‍ ക്യാപ്‌റ്റന്‍ വിരാട് കോഹ്‌ലിയെ സൂക്ഷിക്കണമെന്ന് ഓസ്ട്രേലിയൻ ടീമിന് മുന്‍ നായകന്‍ റിക്കി പോണ്ടിംഗിന്റെ മുന്നറിയിപ്പ്.
കോഹ്‌ലിയെ പുറത്താക്കണമെങ്കില്‍ മികച്ച ബോളിംഗ് പുറത്തെടുക്കാതെ രക്ഷയില്ല. പന്തിന് മൂവ്‌മെന്റ് ഇല്ലെങ്കില്‍ വിരാട് റണ്‍സ് സ്‌കോര്‍ ചെയ്യും. തുടക്കത്തിലേ അക്രമണോത്സുക സമീപനം പുലര്‍ത്തിയാല്‍ തിരിച്ചടിയുണ്ടാകുമെന്ന കാര്യത്തില്‍ സംശയമില്ല. പര്യടനത്തിൽ ഇന്ത്യക്കാണ് മേൽക്കൈ എന്നും പോണ്ടിംഗ് പറഞ്ഞു.
മികച്ച ബോളിംഗിനൊപ്പമുള്ള പ്രകോപനം ഫലം ചെയ്‌തേക്കാം. അല്ലെങ്കില്‍ അത് മോശം പ്രവര്‍ത്തിയാകും. സമ്മര്‍ദ്ദത്തെ അതിജീവിക്കാനുള്ള കോഹ്‌ലിയുടെ മികവ് ഇന്ത്യക്ക് തുണയാകുമെന്നും മുന്‍ ഓസീസ് താരം വ്യക്തമാക്കി.
മികച്ച ഫീല്‍‌ഡിംഗ് ഒരുക്കിയാല്‍ കോഹ്‌ലി റണ്‍സ് കണ്ടെത്തുന്നത് തടയാനാകുമെന്നും പോണ്ടിംഗ് പറയുന്നു. തുടക്കത്തില്‍ തന്നെ ബൌണ്ടറികള്‍ നേടുക എന്നത് കോഹ്‌ലിയുടെ രീതിയാണ്. തേര്‍ഡ് മാനിലേക്ക് കളിക്കാനുള്ള താല്‍പ്പര്യം അദ്ദേഹത്തിനു കൂടുതലാണ്. ടൈറ്റ് ബൗളിംഗിനൊപ്പം ബൗണ്ടറിയില്‍ രണ്ടോ മൂന്നോ അധിക ഫീല്‍ഡര്‍മാരെ നിയോഗിക്കുകയും ചെയ്‌താല്‍ റണ്‍സ് കണ്ടെത്താനാകാതെ കോഹ്‌ലി സമ്മര്‍ദ്ദപ്പെടുമെന്നും പോണ്ടിംഗ് കൂട്ടിച്ചേര്‍ത്തു.
ഓസീസ് ബോളര്‍മാരുടെ കഴിവ് കൊണ്ട് മാത്രമെ ഇന്ത്യന്‍ നായകനെ പുറത്താക്കാന്‍ കഴിയൂ എന്നും അദ്ദേഹം പറഞ്ഞു.
