രോഹിത് ശര്‍മയ്ക്കു പകരം ഹാര്‍ദിക് പാണ്ഡ്യയെ മുംബൈ ഇന്ത്യന്‍സ് നായകനായി പ്രഖ്യാപിച്ചതില്‍ ആരാധകര്‍ക്ക് നീരസം. ഒരിക്കല്‍ ഫ്രാഞ്ചൈസിയെ തള്ളിപ്പറഞ്ഞു പോയവനെ ഇനി നായകനായി അംഗീകരിക്കാന്‍ ബുദ്ധിമുട്ടുണ്ടെന്നാണ് ആരാധകര്‍ ഒന്നടങ്കം പറയുന്നത്. ഹാര്‍ദിക് സ്ഥാനമോഹിയാണെന്നും ടീമിനെ ഐക്യത്തോടെ നയിക്കാന്‍ അറിയില്ലെന്നുമാണ് ആരാധകരുടെ പക്ഷം.
ഹാര്‍ദിക് പാണ്ഡ്യയായിരിക്കും പുതിയ നായകനെന്ന മുംബൈ ഇന്ത്യന്‍സിന്റെ ഔദ്യോഗിക വാട്‌സ്ആപ്പ് ചാനലിലെ പ്രഖ്യാപനത്തോട് അതിരൂക്ഷമായാണ് ആരാധകര്‍ പ്രതികരിച്ചിരിക്കുന്നത്. വാട്‌സ്ആപ്പ് ചാനലില്‍ ഇന്നു രാവിലെ വരെയുള്ള കണക്കനുസരിച്ച് 19,296 റിയാക്ഷനുകളാണ് ഈ പ്രഖ്യാപനത്തിനു ലഭിച്ചിരിക്കുന്നത്. അതില്‍ കൂടുതലും ഹാര്‍ദിക്കിനോടുള്ള നീരസം പരസ്യമാക്കിയുള്ള ആംഗ്രി റിയാക്ഷനുകളാണ്. ഇതുവരെ ഏഴായിരത്തില്‍ അധികം ആംഗ്രി റിയാക്ഷനുകള്‍ ഈ പ്രഖ്യാപനത്തിനു ലഭിച്ചിട്ടുണ്ട്.
മാത്രമല്ല മുംബൈ ഇന്ത്യന്‍സിന്റെ ഇന്‍സ്റ്റഗ്രാം അണ്‍ഫോളോ ക്യാംപയ്‌നും നടക്കുന്നു. ആരാധകരുടെ വികാരത്തെ മാനിക്കാത്ത മാനേജ്‌മെന്റ് നടപടിയില്‍ പ്രതിഷേധിച്ചു നിരവധി പേരാണ് മുംബൈ ഇന്ത്യന്‍സിന്റെ ഇന്‍സ്റ്റഗ്രാം പേജ് അണ്‍ഫോളോ ചെയ്തിരിക്കുന്നത്. 13.3 മില്യണില്‍ അധികം ഇന്‍സ്റ്റഗ്രാം ഫോളോവേഴ്‌സ് മുംബൈയ്ക്ക് ഉണ്ടായിരുന്നു. അതിപ്പോള്‍ 12.8 മില്യണ്‍ ആയി കുറഞ്ഞിരിക്കുകയാണ്.