ന്യൂസിലന്‍ഡിനെതിരായ ഒന്നാം ടെസ്റ്റിലെ രണ്ട് ഇന്നിങ്ങ്‌സിലും പരാജയപ്പെട്ടതൊടെ ഇന്ത്യന്‍ താരം കെ എല്‍ രാഹുലിനെതിരെ വിമര്‍ശനം ശക്തമാകുന്നു. ഒന്നാം ഇന്നിങ്ങ്‌സില്‍ റണ്‍സൊന്നുമെടുക്കാതെ പുറത്തായ താരത്തിന് രണ്ടാം ഇന്നിങ്ങ്‌സില്‍ 12 റണ്‍സ് മാത്രമാണ് നേടാനായത്. ഫീല്‍ഡിലും നിറം മങ്ങിയ പ്രകടനമാണ് താരം നടത്തിയത്. ആദ്യ ഇന്നിങ്ങ്‌സില്‍ ഇന്ത്യ വെറും 46 റണ്‍സില്‍ പുറത്തായതോടെ രണ്ടാം ഇന്നിങ്ങ്‌സില്‍ കെ എല്‍ രാഹുലിന്റെ മുകളില്‍ ഭാരിച്ച ഉത്തരവാദിത്തമാണ് ഉണ്ടായിരുന്നത്. എന്നാല്‍ ഇക്കുറിയും നിരാശപ്പെടുത്തുന്ന പ്രകടനമാണ് രാഹുല്‍ നടത്തിയത്.
ഇന്ത്യന്‍ ടീമില്‍ കോലി കഴിഞ്ഞാല്‍ ഏറ്റവും സാങ്കേതികവുള്ള ബാറ്റര്‍ എന്നതിനാല്‍ തന്നെ ടെസ്റ്റ് ക്രിക്കറ്റില്‍ രാഹുല്‍ തിളങ്ങുമെന്നാണ് കരുതിയിരുന്നതെങ്കിലും രാഹുലിന്റെ ഈ തകര്‍ച്ച ആരാധകരെ നിരാശരാക്കുന്നതാണ്. അതേസമയം ടോപ് ഓര്‍ഡറില്‍ നിന്നും താരത്തെ ആറാം സ്ഥാനക്കാരനാക്കിയത് പ്രശ്‌നമായിട്ടുണ്ടെന്നാണ് ഒരു വിഭാഗം ആരാധകരുടെ വാദം. മോശം പ്രകടനങ്ങള്‍ തുടര്‍ന്നതോടെ ടെസ്റ്റില്‍ കെ എല്‍ രാഹുലിനെ ഇന്ത്യന്‍ പ്ലാനുകളില്‍ നിന്ന് മാറ്റണമെന്നും ആരാധകര്‍ക്കിടയില്‍ അഭിപ്രായമുണ്ട്.
ന്യൂസിലന്‍ഡിനെതിരായ രണ്ടാം ടെസ്റ്റില്‍ ശുഭ്മാന്‍ ഗില്‍ തിരിച്ചെത്തുന്നതോടെ കെ എല്‍ രാഹുലിന് സ്ഥാനം നഷ്ടമാകാന്‍ സാധ്യതയേറെയാണ്. അതേസമയം കെ എല്‍ രാഹുലിന്റെ സ്ഥാനത്ത് സഞ്ജു സാംസണെ ടെസ്റ്റില്‍ പരീക്ഷിക്കണമെന്ന ആവശ്യവും ഒരു കോണില്‍ നിന്നും ഉയരുന്നുണ്ട്. ടെസ്റ്റ് മത്സരങ്ങള്‍ക്കായി തയ്യാറെടുക്കാന്‍ ലീഡര്‍ഷിപ്പ് ടീം തന്നോട് ആവശ്യപ്പെട്ടിട്ടുണ്ടെന്ന് കഴിഞ്ഞ ദിവസമാണ് സഞ്ജു വെളിപ്പെടുത്തിയത്. ബംഗ്ലാദേശിനെതിരെ നേടിയ ടി20 സെഞ്ചുറിയോടെ സഞ്ജുവിന്റെ ആരാധക പിന്തുണയും വര്‍ധിച്ചിട്ടുണ്ട്.
