ഇന്ത്യന്‍ ടി20 ടീമില്‍ വിക്കറ്റ് കീപ്പറായി മലയാളി താരം സഞ്ജു സാംസണെ നിലനിര്‍ത്തണമെന്ന് മുന്‍ ഇന്ത്യന്‍ താരം അഭിനവ് മുകുന്ദ്. ഗൗതം ഗംഭീര്‍ ഇന്ത്യന്‍ ടീമിന്റെ പുതിയ പരിശീലകനായതോടെ സഞ്ജുവിന് കൂടുതല്‍ അവസരങ്ങള്‍ ലഭിക്കുമെന്ന സൂചനകള്‍ ലഭിക്കുന്നതിനിടെയാണ് അഭിനവ് മുകുന്ദ് തന്റെ അഭിപ്രായം വ്യക്തമാക്കിയത്. ടി20 ലോകകപ്പ് നേടിയ ഇന്ത്യന്‍ ടീമില്‍ ഭാഗമായിരുന്നുവെങ്കിലും ലോകകപ്പിലെ ഒരു മത്സരത്തിലും സഞ്ജുവിനെ കളിപ്പിച്ചിരുന്നില്ല. സിംബാബ്വെയ്‌ക്കെതിരെ നടന്ന ടി20 പരമ്പരയിലെ അവസാന മത്സരത്തില്‍ അര്‍ധസെഞ്ചുറിയുമായി സഞ്ജു തിളങ്ങുകയും ചെയ്തിരുന്നു.
ഐപിഎല്ലില്‍ രാജസ്ഥാന്‍ റോയല്‍സ് നായകനായതിന് ശേഷം സഞ്ജുവില്‍ ഒരുപാട് മാറ്റമുണ്ടായതായി അഭിനവ് മുകുന്ദ് പറയുന്നു. ക്യാപ്റ്റനായതോടെ സഞ്ജുവിന് കൂടുതല്‍ പാകത വന്നു. സഞ്ഞു പ്രതിഭാശാലിയാണ്. സാങ്കേതികമായി അദ്ദേഹത്തിന്റെ ബാറ്റിംഗും മികച്ചതാണ്. എന്നാല്‍ ചില സമയത്ത് അനാവശ്യമായ ഷോട്ടുകള്‍ കളിച്ച് സഞ്ജു പ്രതീക്ഷകള്‍ തെറ്റിക്കും. നായകനായതോടെ ഇക്കാര്യങ്ങള്‍ മറ്റമുണ്ടായി. സൂപ്പര്‍ താരങ്ങളോടൊപ്പം യുവതാരങ്ങളെ കൂടി നയിക്കേണ്ട ഉത്തരവാദിത്തമാണ് അവിടെ സഞ്ജുവിനുള്ളത്. അദ്ദേഹം അത് നല്ല രീതിയിലാണ് ചെയ്യുന്നത്.
ബാറ്ററെന്ന നിലയില്‍ പാകത വന്നതിനാല്‍ തന്നെ സഞ്ജുവിനെ ഇന്ത്യ തങ്ങളുടെ ടി20 ടീമില്‍ വിക്കറ്റ് കീപ്പര്‍ ബാറ്ററായി നിലനിര്‍ത്തണം. നിലവില്‍ ഇന്ത്യന്‍ ടീമില്‍ വിക്കറ്റ് കീപ്പര്‍ സ്ഥാനത്തിനായി വലിയ മത്സരമുണ്ട്. സഞ്ജുവിനെ ആ സ്ഥാനത്തിനായി എപ്പോഴും പരിഗണിക്കാമെന്ന് കരുതുന്നു. അഭിനവ് മുകുന്ദ് പറഞ്ഞു.